Fýtbol: «Aqjaıyq» Oralda «Tarazdy» iri eseppen tize búktirdi
ORAL. QazAqparat – Fýtboldan Qazaqstan chempıonatynyń 18-týrynda Oraldyń «Aqjaıyǵy» óz alańynda «Taraz» komandasyn qabyldap, qarsylasyn iri eseppen utty, dep habarlaıdy QazAqparat tilshisi.
Teń nátıjemen aıaqtalǵan «Shahtermen» ótken oıynǵa qaraǵanda, ýkraınalyq maman Vladımır Mazıar baptaıtyn alań ıeleriniń quramynda birqatar ózgeris boldy.
Atap aıtqanda, salqyn tıip qalǵandyqtan, reseılik jartylaı qorǵaýshy Soslan Takýlov pen ýkraınalyq shabýylshy Nıkolaı Kovtalıýk bul joly matchqa qatysa alǵan joq. Esesine Oral fýtbolynyń alty birdeı túlegi alańǵa shyqty.
Birinshi taımda 30 mınýtta reseılik shabýylshy Dmıtrıı Mıchýrenkov 11 metrlik aıyp dobyn dál oryndap, esep ashty.
Ekinshi kezeńde 69-mınýtta reseılik Evgenıı Kozlov oryndaǵan aıyp dobynan keıin oraldyq qorǵaýshy Meıram Sapanov baspen dál soqqy jasaı bildi – 2:0. Eki mınýttan keıin sol qaptaldan E.Kozlovtan pas alǵan Qazaqstan jastar quramasynyń shabýylshysy Vıacheslav Shvyrev esepti 3:0-ge jetkizdi. Bul ekinshi taımda D.Mıchýrenkovtyń ornyna shyqqan V.Shvyrevtiń bıylǵy maýsymdaǵy birinshi goly edi.
Birinshi aınalymda tarazdyqtar óz alańynda 1:0 esebimen utqan edi. Oraldyqtar bıylǵy maýsymda alǵash ret iri eseppen jeńiske jetip, artyǵymen qarymta qaıyrdy.
Bul týrdan keıin 28 upaı jınaǵan «Aqjaıyq» týrnır kestesinde qaıtadan tórtinshi orynǵa kóterildi. «Taraz» 20 upaımen toǵyzynshy satyda qaldy.
Oraldyqtar kelesi kezdesýin 2 shilde kúni Aqtóbede jergilikti klýbpen ótkizedi.
Eske sala keteıik, budan buryn «Aqjaıyqtyń» bıylǵy maýsymda alǵash ret teń oınaǵanyn jazǵan bolatynbyz.
Sýretter – Aıbatyr Nurash
