Fýtbol: «Aqjaıyq» «Oqjetpesti» utyp, onynshy orynǵa kóterildi
ORAL. QazAqparat - Fýtboldan premer-lıga komandalary arasynda el birinshiliginiń 26-týrynda Oraldyń «Aqjaıyǵy» óz alańynda Kókshetaýdyń «Oqjetpesin» qabyldap, 2:0 esebimen jeńiske jetti, dep habarlaıdy «QazAqparat» tilshisi.
Bul kezdesý kósh sońynda kele jatqan qos komanda úshin de asa mańyzdy edi. Sondyqtan «Aqjaıyq» ta, «Oqjetpes» te upaı joǵaltpaý úshin baryn saldy. Bastapqyda qonaqtar belsendilik tanytqanymen, oraldyqtar da qarap qalǵan joq. Aldymen chernogorııalyq shabýylshy Marko Djýrovıchtiń qaýipti soqqysyn «Oqjetpes» qaqpashysy, serbııalyq Sasha Stamenkovıch qaıtardy.
Degenmen birinshi taım sońyna taman, 42-mınýtta Azat Ersálimovtiń sol qaptaldan bergen dobyn ýkraınalyq shabýylshy Konstantın Dýdchenko baspen torda týlatty. Sóıtip kópten qanjyǵasy maılanbaǵan K.Dýdchenko óz esebine bir goldy jazdy. Budan keıin qonaqtar alǵa umtylǵanymen, ózderi qapy qaldy. Qarymta shabýyldan keıin horvatııalyq legıoner Denıs Glavına aıyp alańyna kirmesten, qaqpa toǵyzdyǵyn dál kózdedi.
Ekinshi taımda esep ózgergen joq. Osylaısha, bul oıynnan keıin 23 upaı jınaǵan «Aqjaıyq» onynshy orynǵa kóterildi de, «Oqjetpes» sońǵy satyǵa syrǵydy. Degenmen erteń Qaraǵandynyń «Shahterin» qabyldaıtyn, 22 upaımen 11-inshi orynda turǵan «Aqtóbeniń» «Aqjaıyqtan» ozýyna múmkindigi bar.
Aıta keteıik, óz alańynda «Atyraýdy» 7:0 esebimen oısyrata jeńgen «Astana» upaı sanyn 60-qa jetkizip, burynǵysha jekedara kósh bastap keledi. Qalǵan komandalardyń kezdesýleri jeksenbi kúni ótedi.
