Fýtbol: «Aqjaıyq» komandasynyń jańa maýsymdaǵy quramy tanystyryldy

Komandanyń teń jartysyna jýyǵy - ótken jylǵy maýsymda ózderin jaqsy qyrynan kórsetkender. Sonyń ishinde boıy eki metrden asatyn Denıs Tólebaev qaqpa kiltin nyq ustasa, qorǵaýshylar, komanda kapıtany Meıram Sapanov, Baýyrjan Omarov, Erkin Tapalov, jartylaı qorǵaýshylar Edýard Sergıenko, nıgerııalyq Maıkl Odıbe, serbııalyq Predrag Govedarıtsa, paragvaılyq surmergen Freddı Koronel, chılılik Matıas Rýbıo, Rýslan Valıýllın, Ivan Antıpov, shabýylshy, ýkraınalyq Konstantın Dýdchenko jankúıerlerge jaqsy tanymal deýge bolady. Premer-lıga komandalary arasynda «Aqjaıyq» óz túlekterin oıynǵa kóbirek qosýmen erekshelenip kelgeni belgili. Jańa maýsymǵa daıyndyq barysynda olardyń birqatary basqa klýbtarǵa aýysqanymen, Oralda qalǵandary da barshylyq. Atap aıtqanda, M.Sapanov, B.Omarov, E.Tapalov, R.Valıýllın, I.Antıpovqa qosa bıyl komandaǵa qaqpashy Aleksandr Ýdalov, 1996 jylǵy jartylaı qorǵaýshy Mırad Jarylǵasov qosylyp otyr.

 

Komandaǵa jańadan alynǵandar az emes. Chernogorııanyń «Sýteska» klýbynan qorǵaýshy Jevan Nıkolıch, Túrkııanyń «Ienı Malatıasporynan» nıgerııalyq jartylaı qorǵaýshy Izýka Azý kelse, Venesýelanyń «Estýdıantes de Merıda» komandasynda dop tepken Arenas Delgado «Astana» namysyn qorǵaǵan Roher Kanıastan keıingi Qazaqstan birinshiliginde oınaıtyn ekinshi kolýmbııalyq fýtbolshy atanbaqshy. Bıyl Shyǵys Qazaqstan oblysynyń «Altaı» klýby oılamaǵan jerden premer-lıgadan shettetilip, birinshi lıgaǵa túsip qalǵany belgili. Soǵan baılanysty qaqpashy Vıktor Kotlıar, qorǵaýshy Dmıtrıı Shmıdt, jartylaı qorǵaýshylar Konstantın Zarechnyı men Azat Ersalıev Oralǵa aýysty. Bular «Aqjaıyqqa» tez sińisip, jańa lep bere ala ma, ony ýaqyt kórsetedi. Oǵan qosa Taldyqorǵannyń «Jetisýynan» qorǵaýshy Andreı Shabaev, Petropavldyń «Qyzyljarynan» jartylaı qorǵaýshylar  ıÝrıı Pertsýh pen Georgıı Makaev, Astananyń «Báıtereginen» shabýylshy Samıt Chýlagov alyndy.

 

Komandanyń bas bapkeri, ótken jylǵy maýsymda «Aqjaıyqtyń» premer-lıgadaǵy ornyn saqtap qalǵan qazaqstandyq maman Vahıd Masýdov bıyl barynsha joǵary oryndar úshin kúresýge tyrysatyndaryn jetkizdi. Bul, árıne, ońaı emes. Komandaǵa jańa kelgender bar. Olardyń bir-birimen úırenisip, túsinisip, oınap ketýi úshin ýaqyt kerek. Komanda qatary birshama nyǵaıǵanymen, maýsym barysynda odan da góri kúsheıtý maqsatynda qosymsha oıynshylar tartylýy múmkin. Sonymen qatar jergilikti jastar da nazardan tys qalmaıdy. Munyń bári fýtbolshylardyń ózderine baılanysty. Oıynǵa kim jaqsy daıyn, solar alańǵa shyǵatyn bolady.

 

«Ótken jylǵy maýsymda «Aqjaıyq» komandasyna 971 mln. teńge bólingen bolatyn.  Bıyl da osy kólemde beriledi dep otyrmyz. Qarjy bólý máselesi oblystyq máslıhattyń aldaǵy sessııalarynyń birinde qaralmaqshy. Eń bastysy, oblys namysyn oıdaǵydaı qorǵap, jankúıerlerdi jerge qaratpaý úshin barymyzdy salatyn bolamyz», dedi «QazAqparat» tilshisine «Aqjaıyq» fýtbol klýbynyń dırektory Azat Qazıhanov.

 

Aıta keteıik, batysqazaqstandyqtar jańa maýsymdaǵy alǵashqy matchyn 8 naýryz kúni Pavlodarda azýly komandalardyń biri «Ertispen» ótkizedi. Sodan keıin «Aqjaıyq» fýtbol klýbynyń stadıonynda 12 naýryzda Qaraǵandynyń «Shahterin» qabyldaıdy.