Fýtbol: «Aqjaıyq» komandasyna jańadan bes oıynshy alyndy
ORAL. QazAqparat – Premer-lıgada óner kórsetetin «Aqjaıyq» komandasyna jańadan bes oıynshy alyndy, dep habarlaıdy QazAqparat tilshisi.
«Aqjaıyq» fýtbol klýbynyń dırektory Azamat Shaıhynyń málim etkenindeı, olardyń ekeýi – Oralda aıaqdop álippesin bastaǵan Erkin Tapalov pen Meıram Sapanov.
Jartylaı qorǵaýshy E.Tapalov «Aqjaıyq» sapynda 120 match ótkizip, 1 gol soqty.
Kezinde Qazaqstan ulttyq quramasyna shaqyrylǵan Erkin premer-lıgada 98 oıynda alańǵa shyqty. «Aqjaıyqqa» qaıtyp oralǵanǵa deıin «Shahter» (Qaraǵandy), «Jetisý» (Taldyqorǵan), «Kaspıı» (Aqtaý) komandalarynda top tepti.
Tájirıbeli qorǵaýshy, kezinde oraldyq klýbtyń kapıtany bolǵan M.Sapanov «Aqjaıyq» quramynda 268 kezdesýde 14 goldyń avtory atandy. Sońǵy eki maýsymda «Jetisýdiń» namysyn qorǵady.
Jańadan alynǵandardyń úsheýi – reseılikter. «Aqjaıyqpen» kelisimshartqa 23 jastaǵy jartylaı qorǵaýshy Evgenıı ıAtskıı qol qoıdy. Samara fýtbolynyń túlegi sońǵy eki maýsymdy «Akronda» (Tolıattı) ótkizdi.
Taǵy bir jartylaı qorǵaýshy, 25 jastaǵy Soslan Takýlov «Satýrn» (Ramenskoe), «Slýtsk» (Slýtsk) klýbtarynda oınaǵan. 2020 jyly qaraǵandylyq «Shahter» komandasy sapynda 16 match ótkizdi.
«Krasnodar» klýbynda 2013 jyly kásibı sporttyq jolyn bastaǵan jartylaı qorǵaýshy Marat Býraev ta 25 jasta. Ol ár jyldary armenııalyq «Pıýnık», belorýssııalyq «Slýtsk» komandalarynda oınap úlgerdi.
«Túrkııada ótip jatqan oqý-jattyǵý jıynynda basqa da fýtbolshylardy qarap jatyrmyz. Negizinen jergilikti oıynshylarǵa úmit artatyn bolamyz», dedi QazAqparat tilshisine Azamat Shaıhy.
