Fýtbol: «Aqjaıyq» komandasy Túrkııada jattyǵýda
ORAL. QazAqparat - Bıyl premer-lıgaǵa qaıta oralýdy maqsat etip otyrǵan «Aqjaıyq» komandasy Túrkııada oqý-jattyǵý jıynyn jalǵastyrýda, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, oraldyq komanda 5 aqpan kúni Ózbekstannyń sýperlıgasynda oınaıtyn «Metallýrg» (Bekabad) komandasymen joldastyq kezdesý ótkizdi.
Oraldyqtardyń kapıtany Baýyrjan Omarovtyń aıtýynsha, bul básekede batysqazaqstandyqtar 0:1 esebimen ese jibergenimen, oıynda alǵa basýshylyq bar.
«Bapkerimizdiń bergen tapsyrmalaryn oryndadyq. Bul oqý-jattyǵý jıyny bolǵandyqtan, osy matchtan qorytyndy shyǵaryp, kelesi kezdesýlerde jaqsy nátıjege qol jetkizýge tyrysamyz. Maqsatymyz premer-lıgaǵa shyǵý bolǵandyqtan, sony oryndaý úshin bar kúshimizdi salyp, sheberligimizdi shyńdaı túspekpiz», dedi B.Omarov.
«Aqjaıyqtyń» bas bapkeri, ýkraınalyq maman Sergeı Zaıtsev Ózbekstannyń premer-lıgasynda alǵashqy bestikte júrgen komandamen ótken kezdesýdiń kóńilden shyqqandyǵyn, ásirese, jastardyń qýantqandyǵyn jetkizdi.
«Biz búgin qos qurammen oınadyq. Alǵashqylar 60 mınýtty jaqsy deńgeıde ótkizdi, tek eki-úsh urymtal sátti paıdalana almady. Ekinshi quram qalǵan 30 mınýtqa alańǵa shyqty. Qazirgi kezde nátıje basty maqsat emes. Áýeli dene daıyndyǵy men taktıkaǵa mán berýdemiz. Mysaly, dopty jaqsy ustap, qorǵanystan shabýylǵa tez shyǵa bilý kerek. Eń bastysy, jańa maýsymǵa tap-tuınaqtaı daıyndyqpen barý qajet», dedi S.Zaıtsev.
«Aqjaıyq» Túrkııada taǵy eki joldastyq kezdesý ótkizedi. 8 aqpan kúni Reseıdiń «Ýrojaı» (Krasnodar), 11-inde «Andıjan» (Ózbekstan) klýbtarymen jasyl alańǵa shyǵady.
Eske sala keteıik, budan buryn «Aqjaıyqtyń» Túrkııada qandaı klýbtarmen oınaıtynyn, bas bapkerdiń shaǵyn suhbatyn, oraldyqtardyń Serbııanyń sýperlıgasynda óner kórsetetin «Spartakty» utqanyn jazǵan bolatynbyz.
Odan keıin oraldyqtar joldastyq kezdesýde Bolgarııanyń «Botev» (Vratsa) komandasyna 0:2 esebimen ese jiberdi.
