Fýtbol: «Aqjaıyq» klýbynyń alańdary oınaýǵa jaramsyz dep tanyldy
ORAL. QazAqparat - Qazaqstan kásibı fýtbol lıgasynyń komıssııasy Oraldaǵy P.Atoıan atyndaǵy jáne «Aqjaıyq» fýtbol klýby stadıondarynyń sapasyn tekserip, 27 mamyrdan bastap premer-lıga matchtaryn ótkizýge tyıym saldy, dep habarlaıdy «QazAqparat» tilshisi.
P.Atoıan atyndaǵy stadıondaǵy tabıǵı tósem talapqa saı kelmedi. Sol sekildi «Aqjaıyq» stadıonyndaǵy sıntetıkalyq alań da synaqtan ótpedi. Endi osy stadıondardaǵy jaǵdaıdy túzegenshe, «Aqjaıyq» óz alańyndaǵy oıyndardy Oralda ótkize almaıdy.
Aıta keteıik, qazirgi kezde týrnır kestesinde jetinshi orynda kele jatqan «Aqjaıyq» 28 mamyr kúni Atyraýda jergilikti komandamen sheberlik baıqasady. Sodan keıin 3 maýsymda Oralda «Aqtóbeni» qabyldaýy tıis edi.
«Aqjaıyq» fýtbol klýbynan túsken málimetke qaraǵanda, mine, osy oıyn kórshiles qalalardyń birinde ótýi nemese keıinge qaldyrylýy múmkin, ázirge belgisiz. Sosyn oraldyqtardyń óz alańyndaǵy «Tarazben» ótetin oıyny 25 maýsymǵa belgilengen. Soǵan deıin alańdardy qalpyna keltire ala ma, ony ýaqyt kórsetedi.
