Fýtbol: «Aqjaıyq» el chempıony «Shahterdi» 3:0 esebimen oısyrata utty

Kúnniń mańdaıy sál jipsigenmen, yzǵary qaıtpaǵan, qalyń qardyń kóbesi sógile qoımaǵan osynaý mezgilde dop tebý de ońaı emes ekeni belgili. Degenmen «Aqjaıyq» fýtbolynyń stadıony bıylǵy maýsymǵa jaqsy daıyndalypty, jasyl alań jarqyrap tur.

«Aqjaıyq» oıynshylaryn ortaǵa Oral fýtbolynyń túlegi Rýslan Haıyrov bastap shyqty. Qaqpany 1992 jylǵy Stas Pokatılov qorǵasa, alańda legıonerler ıAkýb Hleboýn, Sadjo Haman, Pavel Cherny, Igor Zenkovıchterge qosa Baýyrjan Omarov, Ilıa Vorotnıkov, Evgenıı Kostrýb, Konstantın Zotov, Nıkolaı Zabrodınder óner kórsetti. Bıyl «Qaırattan» kelgen I.Vorotnıkovten basqasynyń bári - ótken jyly «Aqjaıyq» namysyn qorǵaǵandar. Ótken jyly el birinshiliginiń jeńimpazy atanyp, bıyl sýperkýbokti «Astanamen» oıynda julyp alyp ketken «Shahterdiń» quramy kileń «sen tur, men ataıyn» ekeni anyq. Komanda kapıtany talaı jyldan beri «Shahterdiń» shabýylyn órge súırep kele jatqan Andreı Fınonchenko bolsa, Jambyl Kókeev, Maqsat Baıjanov, Dáýrenbek Tájimbetovterdiń sheberligine eshkim shúbá keltirmeıdi. Biraq «Aqjaıyq» chempıondardan múldem qaımyqqan joq. Oıyn tizginin óz qoldaryna alyp, ońtaıly sátterdi utymdy paıdalana bildi. Ótken jylǵy chempıonattaǵy surmergenderdiń biri, belorýs jigiti Igor Zenkovıchtiń bıyl Oralda birinshi bolyp qaqpa kiltin tabýy zańdy bolsa kerek. Kóp uzamaı shabýylǵa shyǵyp, ese qaıtaramyz degen qonaqtardyń qateliginen keıin I.Zenkovıch esepti 2:0-ge jetkizdi.

Ekinshi taımda «Shahter» bar kúshin salǵanymen, degenine jete almady. Esesine alań ıeleriniń qarsy shabýylyn ótkizip alyp jatty. Osyndaı sátterdiń birinde qaqpaǵa jekedara umtylǵan I.Zenkovıchtiń úshinshi gol soǵatyn múmkindigi bolǵanymen, dop qaqpadan sál qıys ketti. Munyń ornyn oraldyq qorǵaýshy, Qazaqstan jastar quramasynyń múshesi Baýyrjan Omarov toltyryp, qaqpa buryshyn dál kózdedi.

Sóıtip óz alańynda saýatty oınaǵan «Aqjaıyq» 3:0 esebimen jeńiske jetti.

«Aqjaıyq» kelesi oıynyn 15 naýryz kúni syrt alańda «Tarazben» ótkizedi.