Fýtbol: «Aqjaıyq» «Astanany» oısyrata utty
ORAL. QazAqparat - Búgin fýtboldan premer-lıga komandalary arasynda «Aqjaıyq» P.Atoıan atyndaǵy stadıonda el chempıony «Astanany» qabyldap, 3:0 esebimen jeńiske jetti, dep habarlaıdy QazAqparat tilshisi.
Bul HHІІ týrdyń alǵa ysyrylǵan oıyny bolatyn. El birinshiliginde jekedara kósh bastap kele jatqan astanalyqtardyń bási joǵary ekendigi túsinikti edi. Degenmen jasyl alańda nebir kútpegen jaǵdaı bolatyndyǵyn osy kezdesý kórsetti.
«Aqjaıyqtyń» bas bapkeri mindetin atqarýshy Artýr Avakıants chempıonattyń surmergeni, ýkraınalyq Aderınsola Habıb Eseolany birden alańǵa shyǵarǵan joq. Esesine Ýkraına eliniń taǵy bir ókili, talaı jyl Lvovtyń «Karpaty» komandasynyń namysyn qorǵaǵan jartylaı qorǵaýshy Igor Hýdobıak 4-mınýtta Aleksandr Mokın qorǵaǵan qaqpa buryshyn baspen dál kózdedi.
Elordalyqtar shabýyldap baqqanymen, «Aqjaıyqtyń» qaqpashysy Sergeı Tkachýk bastaǵan oıynshylar sátti qorǵana bildi. Ekinshi taımda elordalyq qorǵaýshylardyń qateliginen keıin senegaldyq shabýylshy Malık Mane esepti 2:0-ge jetkizdi.
«Astananyń» bas bapkeri Grıgorıı Babaıan serbııalyq jáne ganalyq shabýylshylar Djordje Despotovıch pen Patrık Tvýmasıdi oıynǵa qosqanymen, odan kóp eshteńe ózgergen joq. Kerisinshe Ivan Antıpovtyń ornyna Eseola shyqqan boıda Mane ekeýi alǵa umtyldy. Áıtse de Maneniń tepken doby qaqpadan qıys ketti. Degenmen 86-mınýtta Eseola bıylǵy birinshiliktegi óziniń segizinshi golyn soqty.
Osylaısha «Aqjaıyq» kútpegen jerden «Astanany» iri eseppen utyp ketti.
Elordalyqtar 31 upaımen burynǵysha kósh bastap kele jatqanymen, olardan almatylyq "Qaırattyń" eki oıyny kem. Qazir 26 upaımen ekinshi orynda turǵan almatylyqtar sol qos kezdesýin sátti ótkizse, astanalyqtardy qýyp jetedi. Al 16 upaı jınaǵan oraldyqtar besinshi orynǵa kóterildi.
Eske sala keteıik, HІІ týrda 27 mamyr, jeksenbi kúni «Astana» - «Jetisý», «Aqjaıyq» - «Qaısar», «Aqtóbe» - «Ertis», «Atyraý» - «Qaırat», «Qyzyljar» - «Ordabasy», «Shahter» - «Tobyl» oıyndary ótedi.
