Fýtbol: «Aqjaıyq» altynshy orynǵa kóterildi
ORAL. QazAqparat - Búgin fýtboldan premer-lıga komandalary arasynda el birinshiliginiń onynshy týrynda Oraldyń «Aqjaıyǵy» óz alańynda Qostanaıdyń «Tobylyn» qabyldap, 1:0 esebimen jeńiske jetti, dep habarlaıdy «QazAqparat» tilshisi.
Batysqazaqstandyqtardyń bas bapkeri Vahıd Masýdov komanda quramynda sál-pál ózgeris jasap, qorǵaýshy Baýyrjan Omarovty, aldyńǵy shepte chılılik Matıas Rýbıony birden oıynǵa qosty. Al jartylaı qorǵaýshy Rýslan Valıýllın qosalqy quramda qaldy.
Oıyn alań ıeleriniń basymdylyǵymen ótkenimen, birinshi taımda «Tobyldyń» quramyndaǵy serbııalyq shabýylshy Djordje Despotovıchtiń tepken aıyp dobyn «Aqjaıyqtyń» qaqpashysy Denıs Tólebaev qaıtara bildi. Ekinshi taımda V.Masýdov alańda biraz ter tókken Azat Ersalımovtyń ornyna talaıdy kórgen tisqaqqan oıynshy Edýard Sergıenkony shyǵardy. Sóıtip jol taýyp ketti dese bolady. Osy Sergıenko 75-mınýtta keri qaıtqan dopty shirene teýip, ádemi gol soqty. Budan keıin «Tobyl» alǵa umtylǵanymen, tarazy basyn teńestire almady.
Osylaısha, qorjynyndaǵy upaı sanyn 13-ke jetkizgen «Aqjaıyq» bıylǵy maýsymda alǵash ret altynshy orynǵa kóterildi. Óıtkeni Qyzylordanyń «Qaısary» Atyraýda jergilikti komandadan 0:1 esebimen (goldyń avtory - serbııalyq Novıtsa Maksımovıch) jeńilip, 7-inshi orynǵa syrǵydy. Al Qaraǵandynyń «Shahteri» Astanada ótken oıynda Kókshetaýdyń «Oqjetpesin» 2:0 esebimen (qos dopty da soqqan Aıdos Táttibaev) tize búktirip, bıylǵy maýsymdaǵy birinshi jeńisine qol jetkizdi. Shymkenttiń «Ordabasy» komandasy Pavlodarda «Ertisti» 1:0 esebimen (Pablo Fontanello) utyp, týrnır kestesinde úshinshi orynǵa shyqty.
