Fýtbol: «Aqjaıyq» Almatyda «Qaıratty» utyp ketti

«Astanamen» chempıondyq ataq úshin talasyp kele jatqan almatylyqtar úshin bul oıyn mańyzdy edi. Al oraldyqtarǵa sońǵy oryndarǵa túsip qalmaý úshin upaı aýadaı qajet bolatyn.

Ýkraınalyq maman Sergeı Zaıtsev jattyqtyratyn batysqazaqstandyqtar kileń yǵaı men syǵaı oınaıtyn qarsylastarynan yǵa qoıǵan joq. Bir qyzyǵy, qos komandany baılanystyratyn derekter bar edi. Bıylǵy birinshilikti «Aqjaıyqtyń» quramynda bastap, surmergenge aınalǵan ýkraınalyq shabýylshy Aderınsola Eseolanyń jazda «Qaıratqa» aýysqany belgili. Sol sekildi Oral fýtbolynyń túlegi Stas Pokatılov almatylyqtardyń qaqpasyn qorǵady.

Birinshi taım basynda qonaqtar belsendi bolǵanymen, kóp uzamaı alań ıeleri oıyn tizginin qolǵa aldy. Degenmen oraldyqtar da qarap qalmaı, qarymta shabýylǵa shyǵyp otyrdy. Ásirese, senegaldyq shabýylshy Malık Mane qaqpa aldynda dopqa sál jetpeı qaldy.

Oıynnyń ekinshi kezeńinde almatylyqtar jıi shabýyldady. Osyndaı sátterde ýkraınalyq qaqpashy Evgenıı Borovık «Qaırattyń» kapıtany Baýyrjan Islamhan men A.Eseolanyń qaýipti soqqylaryn qaıtara bildi.

Match aıaqtalýǵa 15 mınýttaı ýaqyt qalǵanda, oń qaptaldan Azat Ersálimovtiń bergen dobyn Erkebulan Nurǵalıev baspen qaqpaǵa dál túsirdi. Budan keıin almatylyqtar qansha tyrysqanymen, esep ózgergen joq.

Osylaısha «Aqjaıyq» kútpegen jerden 1:0 esebimen «Qaıratty» utyp ketti. Bul týrda «Qaısarmen» óz alańynda teń oınaǵan elordalyqtar da upaı joǵaltty. Qazir almatylyqtardyń birinshi oryndaǵy «Astanadan» tórt birdeı upaıy kem. Al 29 upaı jınaǵan S.Zaıtsevtiń shákirtteri týrnır kestesinde jetinshi orynǵa kóterildi. Degenmen batysqazaqstandyqtarǵa bosańsýǵa bolmaıdy. Olar 27-týrda el chempıony «Astanany» qabyldaıdy.

Aıta keteıik, óz alańynda Petropavldyń «Qyzyljarynan» 0:1 esebimen utylyp qalǵan Pavlodardyń «Ertisi» sońǵy orynnan kóteriler emes. Qaraǵandyda «Atyraýdy» 2:1 esebimen jeńgen «Shahter» 10-satyda keledi. Alǵashqy úshtikten úmitker «Tobyl» men «Jetisý» komandalary Qostanaıda 2:2 esebimen teń tarqasty.