Fýtbol: «Aqjaıyq» alǵashqy jeńisine qol jetkizdi
ORAL. QazAqparat – Fýtboldan Qazaqstan chempıonatynyń ekinshi týrynda Oraldyń «Aqjaıyǵy» óz alańynda «Atyraý» komandasyn qabyldady, dep habarlaıdy QazAqparat tilshisi.
Qos klýb ta ótken jylǵy maýsymda birinshi topta óner kórsetip, premer-lıgaǵa joldama alǵan edi.
Birinshi týrda atyraýlyqtar Atyraýda qaraǵandylyq «Shahterden» utylyp qalsa, oraldyqtar syrt alańda «Tobylǵa» 0:2 esebimen ese jibergen bolatyn. Sondyqtan eki komandaǵa da upaı aýadaı qajet edi.
Birinshi taımda fýtbolshylar alma-kezek shabýyldaǵanymen, esep ashylǵan joq.
Matchtyń ekinshi kezeńinde 73-mınýtta buryshtamadan berilgen doptan keıin bıyl «Aqjaıyqqa» qaıta oralǵan Oral fýtbolynyń túlegi Erkin Tapalov baspen qaqpany dál kózdedi – 1:0. Match sońyna taman dóreki oınap, eki eskertý qaǵazy kórsetilgen «Atyraý» sapyndaǵy polshalyq shabýylshy Petr Gjelchak alańnan qýyldy.
Osylaısha «Aqjaıyq» bıylǵy maýsymdaǵy alǵashqy jeńisine qol jetkizdi. Ýkraınalyq maman Vladımır Mazıardyń shákirtteri kelesi oıynyn 4 sáýir kúni syrt alańda shymkenttik «Ordabasymen» ótkizedi.
Taǵy bir kezdesý elordadaǵy «Astana Arena» stadıonynda ótti. Munda «Shahter» «Ordabasy» komandasyn qabyldady. 50-mınýtta «Ordabasy» sapyndaǵy serbııalyq qorǵaýshy Aleksandr Sımchevıch mergendik tanytty. 87-mınýtta Sergeı Hıjnıchenko esepti 2:0-ge jetkizdi.
Eske sala keteıik, budan buryn «Jetisýdiń» «Turandy» oısyrata utqanyn jazǵan bolatynbyz.
