FÝTBOL: «Aqjaıyq» alǵashqy aınalymdy altynshy orynmen aıaqtady
ORAL. QazAqparat - Birinshi lıga komandalary arasynda fýtboldan Qazaqstan chempıonatynyń alǵashqy aınalymy márege jetti.
Áp degende Aqtaýdyń «Kaspııi» men Shymkenttiń «Qyrany» sýyrylyp alǵa shyqqanmen, keıin olardy Óskemenniń «Vostogy» men Kókshetaýdyń «Oqjetpesi» syndy premer-lıganyń «dámin tatyp kórgen» komandalar óksheleı bastady. Qazirgi kezde sońǵy týrda jeńilis tapqan «Qyran» men «Kaspııde» 31 upaıdan bolsa, úshinshi-tórtinshi oryndaǵy «Vostok» pen «Oqjetpestiń» olardan nebári úsh-aq upaıy kem. «Ekibastuz» 26 upaımen besinshi, Oraldyń «Aqjaıyǵy» 22 upaımen altynshy orynda keledi. Demek, bul ekinshi aınalymda premer-lıgaǵa beriletin qos joldama úshin tartys kúsheıe túsedi degen sóz.
Birinshilikti aıaǵyna jem túsken tusaýly attaı kibirtiktep bastaǵan «Aqjaıyqtyń» keıingi týrlarda ǵana «júrisi» túzele bastady. Alǵashqy aınalymnyń sońǵy oıynyn oraldyqtar Petropavlda jergilikti «Qyzyljarmen» ótkizdi.
Bul eki komanda týrnır kestesinde bir-birimen «quıryq tistesip» kele jatqan bolatyn. Soǵan saı kezdesý de tartysty ótti. Ekinshi taımnyń basynda Alekseı Maltsev «Aqjaıyqty» alǵa shyǵarǵanymen, 81-shi mınýtta alań ıelerinen Áset Qabdollaev esepti teńestirdi. Degenmen oıyn sońyndaǵy qosymsha mınýtta Borýt Semler oraldyqtarǵa jeńis áperdi. Qýanyshtan buryshtama jalaýyn teýip, syndyrǵan B.Semler ekinshi eskertý alyp, alańnan qýyldy. Sóıtip keıingi kezde mergendigimen kózge túsip júrgen slovenııalyq oıynshy kelesi matchqa qatysa almaıdy.
Batysqazaqstandyqtar ekinshi aınalymdy 2 tamyz kúni óz alańynda osy «Qyzyljarmen» bastaıdy.
