Fýtbol: «Aqjaıyq» «Aqtóbemen» teń oınady
ORAL. 30 naýryz. QazAqparat - 30 naýryz kúni fýtboldan Qazaqstan chempıonaty premer-lıgasynyń úshinshi týrynda Oraldyń «Aqjaıyǵy» kósh basyndaǵy «Aqtóbe» komandasyn qabyldady.
Oraldyqtardan belarýs legıoneri Igor Zenkovıchtiń jaraqattanyp qalýyna baılanysty onyń ornyna jartylaı qorǵaýshy Sergeı Shevtsov shyǵyp, cheh Pavel Cherny shabýyl ótine qaraı oıysty. Bastapqyda qos komanda qorǵanysqa kóńil bólip, asa saq oınady. Ásirese, «Aqjaıyq» qarymta shabýylǵa shyǵyp otyrdy. Sondaı sáttiń birinde, 32-mınýtta kamerýndyq jartylaı qorǵaýshy Sadjo Haman baspen qonaqtardyń qaqpasyn dál kózdedi. Alaıda arada bir mınýt ótpeı jatyp aqtóbelikterdiń kapıtany, kópti kórgen qorǵaýshy Petr Badlo esepti teńestirip ketti.
Ekinshi taımda aqtóbelikter shıraǵyraq oınady. Alaıda birneshe múmkindikti paıdalana almady. Esesine oraldyqtardyń oıyny qojyrap, ásirese, shabýyl shebinde ójettik tanytqan joq. Nıkolaı Zabrodın men Sadjo Hamandy almastyrǵan Alekseı Maltsev pen 1996 jylǵy Ivan Antıpov ta kezdesýge jan kirgize almady. Sóıtip match 1:1 esebimen teń aıaqtaldy.
Úsh týrdan keıin 7 upaımen aqtóbelikter burynǵysha top bastasa, 5 upaıy bar «Aqjaıyq» «Tarazben» 2-3 oryndardy bólisýde. Oraldyqtar kelesi kezdesýin syrt alańda 6 sáýir kúni taǵy bir myqty komanda Qostanaıdyń «Tobylymen» ótkizedi.
