Fýtbol: «Aqtóbe» men «Tobyl» komandalary teń tarqasty
NUR-SULTAN. QazAqparat – Fýtboldan Qazaqstan chempıonaty ekinshi týrynda Almatydaǵy «Jas qyran» stadıonynda «Aqtóbe» Qostanaıdyń «Tobyl» komandasyn qabyldady, dep habarlaıdy QazAqparat tilshisi.
Premer-lıgaǵa qaıta oralǵan aqtóbelikter birinshi týrda Aqtaýda «Kaspıımen» teń oınasa, qostanaılyqtar «Aqjaıyqty» 2:0 esebimen utqan edi.
Bul joly birinshi taımda esep ashylǵan joq.
Matchtyń ekinshi kezeńinde 54-mınýtta «Aqtóbe» sapyndaǵy ózbekstandyq shabýylshy Igor Sergeev mergendik tanytyp, esep ashty. Degenmen 71-mınýtta Serikjan Mýjıkov oryndaǵan aıyp dobyn «Aqtóbe» qaqpashysy Jasýr Narzıkýlov qaıtarǵanymen, oǵan birinshi bolyp jetken Oral fýtbolynyń túlegi Rýslan Valıýllın tarazy basyn teńestirdi – 1:1.
Osylaısha ekinshi týrdyń sońǵy oıynynda «Aqtóbe» men «Tobyl» teń tarqasty.
Týrnır kestesinde Almatynyń «Qaıraty» 6 upaımen kósh bastasa, odan keıingi oryndarda 4 upaımen «Astana», «Tobyl», «Taraz» komandalary keledi.
Úshinshi týrdyń kezdesýleri 4 sáýir kúni ótedi. Onda «Kaspıı» - «Jetisý», «Tobyl» - «Astana», «Atyraý» - «Aqtóbe», «Ordabasy» - «Aqjaıyq», «Turan» - «Qaısar», «Qyzyljar» - «Shahter» komandalary ózara synǵa túsedi.
Eske sala keteıik, budan buryn «Jetisýdiń» «Turandy» oısyrata utqanyn, «Aqjaıyqtyń» alǵashqy jeńisine qol jetkizgenin jazǵan bolatynbyz.
