FÝTBOL: «Aqtóbe» Chempıondar lıgasynda «Stıaýamen» teń tústi
ASTANA. QazAqparat - Qazaqstan Premer-lıgasynyń chempıony «Aqtóbe» fýtbol klýby Chempıondar lıgasynyń úshinshi raýndynda rýmynııalyq «Stıaýamen» 2:2 esebimen teń tústi.
Aqtóbe alańynda ótken matchty qazaqstandyq komanda belsendi bastaǵan bolatyn. Alaıda sáttilik «Stıaýaǵa» serik boldy. Qarsylastardyń shabýyldarynyń birinde Sıdelnıkov qatelikke boı aldyryp, qonaqtar esepti ashty. Gol avtory - Kesherý.
Ekinshi taımda Korobkın buryshtamadan berilgen pasty utymdy paıdalanyp, esepti teńestire aldy. Biraq aqtóbelik jankúıerlerdiń qýanyshy kópke sozylmady. Alystan shirene tebilgen dop qorǵaýshylardyń birinen serpilip, qaqpada týlap sala berdi.
Kóp kúsh jumsamaı eki soqqy jasap, ekeýin de golǵa aınaldyrǵan qonaqtar osymen jeńis enshimizde dep oılasa kerek, myǵym qorǵanysqa kóshti. Alaıda «Aqtóbe» fýtbolshysy Arzýmanıan sońǵy mınýttarda gol salyp, jergilikti komandany jeńilisten saqtap qaldy.
