FÝTBOL: «Aqtóbe» - chempıon. VIDEO
ASTANA. 3 qarasha. QazAqparat - Fýtboldan Qazaqstan chempıonaty aıaqtaldy. Bıylǵy maýsymnyń úzdigi - «Aqtóbe», dep habarlaıdy «Alaman».
«Aqtóbe» óz alańynda «Ordabasyny» qabyldaǵan. Alań ıeleri osy matchta teń tússe, chempıondyqty rásimdeýge múmkindigi bar edi. Nıkıtenko shákirtteri alǵa qoıǵan maqsatty oryndady. Oıynnyń 31 mınýtynda shymkenttikter sapynan Roman Paholıýk esep ashqan. Match aıaqtalýyna tórt mınýt qalǵanda 88 mınýtta ıÝrıı Logvınenko esepti teńestirdi. Araǵa bir mınýt salyp, «Ordabasy» sapynan Evgenıı Levın gol salyp, óz komandasyn qaıta alǵa shyǵardy. Al tóreshi qosqan ýaqytta Abat Álimbetov esepti qaıta teńestirdi. Osylaısha, «Aqtóbe» qajetti bir upaıyn alyp, jeńimpaz atandy.
Qaraǵandyda «Shahter» men «Astana» kezdesti. «Astana» jeńiske jetip, «Ordabasynyń» jeńýin tilegen. 13-mınýtta alań ıeleri sapynan Vadım Borovskıı alǵashqy goldy salǵan. Eki mınýt ótpeı jatyp, Sıserý Kazımıro tarazy basyn teńestirdi. Tablodaǵy bul esep birinshi taım boıy saqtaldy. Al ekinshi taım bastala sala Tanat Nóserbaev «Astanany» alǵa shyǵardy. 62 mınýtta Nóserbaevtyń pasyn utymdy paıdalanǵan Patrık Tvýması esepti eseledi. «Astana» bıylǵy maýsymnyń kúmis júldesin aldy.
Pavlodardaǵy «Ertis» pen «Qaırat» arasyndaǵy oıynda almatylyqtar jeńiske jetti - 3:2. «Qaırat» qola júlde ıelendi.
Al «Aqjaıyq» keler jyly birinshi lıgada oınaıdy. Ol komandanyń ornyn «Qaısar» basady. «Vostok» pen «Semeı» premer-lıgaǵa beriler bir joldamaǵa talasady.
