Fýtbol: «Aqtóbe» - «Aqjaıyq» kezdesýinde segiz gol soǵyldy
ORAL. QazAqparat - Búgin fýtboldan Qazaqstan chempıonatynyń onynshy týrynda «Aqtóbe» óz alańynda «Aqjaıyqty» qabyldap, 5:3 esebimen jeńiske jetti, dep habarlaıdy QazAqparat tilshisi.
FIFA tártiptik komıtetiniń sheshimimen alty birdeı upaıynan aıyrylǵan «Aqtóbe» klýby bıylǵy chempıonat barysynda qıyn jaǵdaıda qalǵan bolatyn. Nebári 4 upaımen kósh sońynda kele jatqan aqtóbelikterdiń alǵa umtylatyny anyq edi. Solaı boldy da. «Aqjaıyqtyń» qaqpashysy Evgenıı Borovık birneshe ret sátti oınaǵanymen, ol kópke sozylmady. 27-mınýtta Baǵdad Qaıyrov qaqpa kiltin tapsa, 41-mınýtta Markos Pızzellı, 45-mınýtta Reınaldo esepti 3:0-ge jetkizdi.
Ekinshi taımda alań ıeleriniń qarqyny báseńdegen joq. 56-mınýtta Reınaldo, 67-mınýtta Pızzellı mergendigimen tanyldy. Match barysynda sylbyr oınaǵan qonaqtardyń tek sodan keıin ǵana esi kirgendeı boldy. 73-mınýtta ýkraınalyq qorǵaýshy Sergeı Basov, eki mınýttan keıin onyń otandasy, shabýylshy Aderınsola Habıb Eseola esepti qysqarta aldy. 83-mınýtta senegaldyq shabýylshy Malık Mane «Aqjaıyq» sapyndaǵy alǵashqy golyn soqty. Budan árige meımandardyń shamasy jetpedi.
Osylaısha bir matchta segiz gol soǵyldy. Bul - bıylǵy chempıonattaǵy qos qaqpaǵa eń kóp gol toǵytylǵan kezdesý. Bul, ekinshi jaǵynan, qos komandanyń, ásirese, «Aqjaıyqtyń» qorǵanys shebiniń jıi syr bergenin kórsetedi. Onyń ústine ýkraınalyq maman Vladımır Mazıar jattyqtyratyn oraldyq klýb bıylǵy maýsymda óz qaqpasyna eń kóp gol (18) ótkizip alǵan komanda bolyp otyr. Osydan bapkerler de, oıynshylar da tıisti qorytyndy shyǵaratyn bolar.
Aıta keteıik, onynshy týrda Atyraýda jergilikti komandany 2:0 esebimen súrindirgen «Astana» 28 upaı jınap, ekinshi oryndaǵy qorjynynda 23 upaıy bar «Qaırattan» uzaı tústi. Elordalyqtardan bir oıyny kem almatylyqtar Qostanaıda «Tobyldan» 0:1 esebimen utyldy. Bul «Qaırattyń» bıylǵy birinshiliktegi alǵashqy jeńilisi edi. Qostanaılyqtar 19 upaımen úshinshi orynda keledi. Degenmen erteń Taldyqorǵanda «Jetisý» komandasymen oınaıtyn «Ordabasy» (Shymkent) olardy qýyp jetýi múmkin. Temirtaýda Qaraǵandynyń «Shahterin» negizgi ýaqytqa qosylǵan úshinshi mınýtta Igor Pıkalkınniń óz qaqpasyna engizip alǵan golynan keıin utyp ketken Pavlodardyń «Ertisi» altynshy orynǵa kóterildi. Buǵan deıin úzdik altylyqty túıindep kele jatqan oraldyqtar segizinshi satyǵa yǵysty. Petropavlda «Qyzyljarmen» 0:0 esebimen teń tarqasqan Qyzylordanyń «Qaısary» jetinshi orynǵa shyqty.
19 mamyr kúni chempıonattyń on birinshi týrynda «Aqjaıyq» - «Jetisý», «Astana» - «Aqtóbe», «Qaısar» - «Atyraý», «Ertis» - «Qyzyljar», «Qaırat» - «Shahter», «Ordabasy» - «Tobyl» kezdesýleri ótedi.
