FÝTBOL: A. Esimov jýrnalıster komandasynyń quramynda qarsylastar qaqpasyna 3 gol saldy
ALMATY. QazAqparat - Búgin Almatyda jýrnalıster qurama komandasy «Bylǵary dop» týrnıriniń úzdik oıynshylarynan quralǵan qurama komandany 4:0 esebimen tize búktirdi.
Jýrnalıster komandasy sapynda oınaǵan Almaty qalasynyń ákimi Ahmetjan Esimov 3 gol salyp het-trık jasady.
Jýrnalıster kúni qarsańynda uıymdastyrylǵan bul joldastyq kezdesýde jasyl alańǵa Janarbek Áshimjan, Amangeldi Seıithanov, Genıı Tólegenov sekildi belgili jýrnalıster shyqty.
Al qarsylastar komandasynda «Bylǵary dop» týrnıriniń 2011-2012 maýsymynyń jeńimpazdary 15 jastaǵy balǵyn fýtbolshylar óner kórsetti. Olar kezinde «KOPA Koka-Kola» halyqaralyq týrırinde ekinshi oryn alǵan bolatyn. Aralarynda Brazılııadan búgin ushyp kelgen, onda fýtboldan álem birinshiliginiń ashylý saltanatyn, alǵashqy matchty tamashalap qaıtqan Táýkehan Júnis, Shadııar Aryntaı jáne Aıdos Poshan da oınady. Jas fýtbolshylar Brazılııaǵa «Bylǵary dop» týrnıriniń eń úzdik oıynshylary retinde barǵan bolatyn.
«Qazir Brazılııada fýtbldan álem birinshiligi ótip jatyr. Oǵan qosa Jýrnalısterdiń kásibı merekesi de jaqyndap keledi. Jalpy jýrnalıster sportqa óte jaqyn halyq qoı. Sondyqtan biz Almaty qalasynyń ákimine ótinish jasadyq.. Ákim ótinishimizdi qabyl aldy. Sondyqtan osy joldastyq kezdesýdi uıymdastyrdyq. Jýrnalıster jeńiske jetip, mereıimizdi ústem etti» - dedi óz sózinde Qazaqstan Jýrnalıster odaǵynyń tóraǵasy Seıitqazy Mataev.
