Fýtbol: 2030 jylǵy álem birinshiligi qaıda ótedi
ASTANA. QazAqparat - Fýtboldan 2030 jylǵy álem birinshiligin ótkizýge úmitkerler qatary molaıyp keledi. Olardyń qataryna Bolgarııa, Rýmynııa, Serbııa jáne Grekııa elderi birlese otyryp dop dodasyn uıymdastyrýǵa ótinish bildirdi, dep habarlaıdy QazAqparat tilshisi.
Qazirgi tańda atalmysh elderdiń Úkimet basshylary bul usynysty maquldap otyr. Balqan túbegindegi tórt memleket osylaısha birlesip álem birinshiligin ótkizýge nıet tanytty.
Aıta ketelik, atalmysh álem birinshiligi mereıtoılyq shara bolady. Esterińizge sala ketsek, alǵashqy dop dodasy 1930 jyly Ýrýgvaıda ótti. Sodan beri dúnıejúzilik báseke 21 márte jalaýyn kóterip úlgerdi.
Qazirgi kúnge deıin álemniń 17 memleketi álem birinshiligin ózderinde qabyldady. Olardyń arasynda Meksıka, Italııa, Frantsııa, Germanııa men Brazılııa mýndıaldy ózderinde eki márte uıymdastyrdy. 2002 jyly birinshilik tarıhynda tuńǵysh ret álem birinshiligi eki memlekette - Japonııa men Ońtústik Koreıada bolyp ótti.
Qazirgi tańda 2030 jylǵy álem birinshiligin ótkizýden birneshe memleket úmitker bolyp otyr. Olardyń barlyǵy derlik dop dodasyn birlesken túrde ótkizýge nıet jasap otyr. Atap aıtqanda, Ońtústik Amerıkadan - Argentına, Ýrýgvaı, Paragvaı birigip ótkizýge nıet bildirse, Afrıkadan - Týnıs, Aljır, Marokko, Azııadan - Ońtústik Koreıa, Soltústik Koreıa, Japonııa men Qytaı memleketteri osyndaı oıda otyr.
Esterińizge sala ketelik, dúbirli dodada 2022 jyly Katarda bolsa, 2026 jyly AQSh, odan ári Kanada, Meksıkada jalaýyn kóteretin bolady. Aıta keterligi, 2026 jyly tuńǵysh ret álem birinshiligi fınaldyq kezeńinde 48 qurama synǵa túsedi.
