Fýtbol: 17 jáne 19 jasqa deıingi qyzdarymyz qarsylastaryn bildi
ASTANA. Jeltoqsannyń 20-sy. QazAqparat /Ernur Aqanbaı/ - Fýtboldan 17 jasqa deıingi jáne 19 jasqa deıingi áıelder quramalary arasyndaǵy 2010/2011 jylǵy Eýropa chempıonattarynyń irikteý týrnırleriniń jerebesi tartyldy,
dep habarlaıdy QazAqparat.
Jerebe boıynsha Qazaqstannyń 19 jasqa deıingi áıelder quramasy Shveıtsarııa, Polsha jáne Makedonııa komandalarymen birge besinshi topta óner kórsetetin boldy. Bizdiń toptaǵy oıyndar Makedonııada ótedi. Bul jas sanatyndaǵy Eýropa chempıonatynyń fınaldyq týrnıri Italııada bolady. Bul eldiń quramasy chempıonat qojaıyny retinde irikteý týrnırine qatyspaıdy. Germanııa quramasy jarysty ekinshi irikteý kezeńinen bastaıdy. Birinshi irikteý kezeńinde 11 topqa bólingen 44 komanda oınaıdy. Toptardaǵy matchtar 2010 jylǵy qyrkúıektiń 11-16-sy kúnderi ótedi. Óz toptarynda 1-shi jáne 2-shi oryn alǵan komandalar, sondaı-aq úshinshi oryn alǵandardyń ishindegi eń úzdigi ekinshi irikteý kezeńine shyǵady.
Al 17 jasqa deıingi qyzdar arasyndaǵy 2010/2011 jylǵy Eýropa chempıonatynyń fınaldyq týrnıri tórt komandanyń qatysýymen Shveıtsarııanyń Non qalasynda ótedi. Jerebe boıynsha Qazaqstan quramasy Fınlıandııa, Norvegııa jáne Serbııa komandalarymen birinshi topqa tústi. Bul toptaǵy irikteý týrnıri 2010 jylǵy qyrkúıektiń 25-30-y aralyǵynda Fınlııandııada ótedi.
Jalpy irikteý týrnırine 41 komanda qatysady. Bunyń aldyndaǵy eki birdeı chempıonattyń jeńimpazy retinde Germanııa jarysty ekinshi irikteý kezeńinen bastaıdy. Qalǵan 40 komanda 10 topqa bólinip otyr. Kelesi kezeńge ár toptyń jeńimpazdary jáne ekinshi oryn alǵan úzdik bes komanda shyǵady.
