Fýtbol: 13-shi týrdan keıin kósh basyndaǵy komandalardyń teketiresi kúsheıe tústi
ASTANA. Mamyrdyń 31-i. QazAqparat /Ernur Aqanbaı/ - Keshe fýtboldan Premer-lıga komandalary arasynda Qazaqstan chempıonatynyń 13-shi týry ótti.
Bul týrdyń ortalyq kezdesýi kósh basyndaǵy komandalar - Qaraǵandynyń «Shahteri» jáne Qostanaıdyń «Tobyly» arasyndaǵy oıyn 1:1 esebimen teń aıaqtaldy. Upaı sanyn arttyrý úshin ózderine berilgen bul múmkindikti Pavlodardyń «Ertis» komandasy utymdy paıdalandy, olar óz alańynda Astananyń «Lokomotıv» komandasyn 3:1 esebimen jeńdi. Sóıtip 13-shi týrdan soń kósh basyndaǵy komandalar arasyndaǵy teketires kúsheıe tústi. Qazir «Tobylda» - 26, «Ertiste» - 25, al «Shahterde» - 24 upaı bar. Maýsymdy sylbyr bastaǵan, ótken maýsymdaǵy el chempıony - «Aqtóbe» bıyl da bas júldeden dámeli. Olar sońǵy týrda Taldyqorǵannyń «Jetisý» klýbyn qabyldap, 2:1 esebimen jeńiske jetti. Sóıtip 22 upaımen 4-shi orynǵa kóterildi. Bul týrdaǵy qalǵan matchtardyń nátıjeleri mynadaı: «Taraz»-«Ordabasy» 0:0, «Oqjetpes»-«Qaırat» 0:1, «Atyraý»-«Aqjaıyq» 2:0.
