Fýrmanov shyńyna shyqqan týrıster adasyp qalǵan

ALMATY. QazAqparat - Respýblıkalyq jedel-qutqarý jasaǵynyń qutqarýshylary tumanda Almaty taýlarynda adasyp ketken týrısterge kómektesti, dep habarlaıdy QazAqparat tilshisi.

Respýblıkalyq jedel-qutqarý jasaǵynyń málimetinshe, 24 maýsym kúni RJQJ-ǵa taýda eki jas jigittiń adasyp ketkeni týraly aqparat kelip tústi. Aqparat boıynsha, olar «Medeý» muz aıdynynyń mańynda bolǵan, taýlarda qatty jańbyr jaýǵan. Jedel top dereý izdestirý-qutqarý jumystaryna shyqty. Jolda qutqarýshylar adasqandarǵa qońyraý shalyp, jigitterdiń geolokatsııasyn anyqtady.

«Respýblıkalyq jedel-qutqarý jasaǵynyń qyzmetkerleri týrısterge qaraı jaıaý júrip, jol boıy jastarmen habarlasyp, olardyń ornalasqan jerin naqtylap otyrdy. Alynǵan aqparatqa súıene otyryp, jedel top Fýrmanov shyńyna qaraı bet aldy (bıiktigi teńiz deńgeıinen 3053 metr). Іzdestirý-qutqarý operatsııasy qatty bulttylyq pen tumanmen kúrdelene tústi, kóriný óte nashar, jańbyr jaýyp, ylǵaldanǵan shóp syrǵanaq boldy. Qutqarýshylar shyńǵa jaqyndaǵanda shamnyń jaryǵyn kórdi, vızýaldy baılanys ornatyldy. Týrıster Fýrmanov shyńy mańyndaǵy baqylaý palýbasynan tabyldy, olar qatty sharshap jáne muzdap qalǵan. Eshkimge medıtsınalyq kómek qajet bolmady», - dep habarlady «QR TJM RJQJ» MM baspasóz qyzmetinen.

Respýblıkalyq jedel-qutqarý jasaǵynyń qyzmetkerleri taýda adasyp ketkendermen profılaktıkalyq áńgime júrgizi. Týrıster qaladaǵy qaýipsiz jerge jetkizildi.