Fýrmanov aınalma kanaly 40 jyldan keıin tazartylyp jatyr
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov azamattardy qabyldap, sý sharýashylyǵyna qatysty qazaqstandyqtardy alańdatqan suraqtarǵa oflaın jáne onlaın formatta jaýap berdi.
Atap aıtqanda, Jambyl oblysyndaǵy Tasótkel sý qoımasyndaǵy sý deńgeıiniń tómendeýi jáne Shý ózeniniń sýyn Túrkistan oblysynyń Sozaq aýdanyna jetkizý máselesi kóterildi.
– Qazirgi tańda Tasótkel sý qoımasynda 128,3 mln tekshe metr sý bar. Bul kólem vegetatsııa kezeńin turaqty aıaqtaýǵa jetkilikti. Nysan jyl basynda bekitilgen kestege sáıkes jumys istep tur. Sý tapshylyǵynyń týyndaý qaýpi joq, sharýalardyń egin sýarýǵa qajettiligi tolyq qamtamasyz etilip jatyr. Qyrkúıek aıynda sý qoımasyn toltyrý jumystary bastalady. Oǵan qosa, Fýrmanov aınalma kanalyn 40 jyldan keıin alǵash ret tazartý jumystary qolǵa alyndy. Qazir kanaldyń 17,3 shaqyrymy tazartylyp, eń kúrdeli ýchaskelerinde jumys aıaqtaldy. Jumystarǵa 9 arnaıy tehnıka paıdalanylyp jatyr, - dedi Sý resýrstary jáne ırrıgatsııa mınıstri Nurjan Nurjigitov.
Bıyl sýarý maýsymynyń basynan beri Jambyl oblysynyń Shý aýdanyndaǵy sharýalar Tasótkel sý qoımasynan 120 mln tekshe metr sý aldy. Bul kólem jergilikti «Qazsýshar» RMK fılıalymen jasalǵan kelisimsharttarda kórsetilgen mólsherden 6,1 mln tekshe metrge artyq.
Al Moıynqum aýdanynyń aýyl sharýashylyǵy men ekologııalyq qajettilikterine 69 mln tekshe metr sý jiberildi.
Qoǵamdyq qabyldaýda Shymkent qalasynyń turǵyndary Toǵys jáne Badam sý qoımalaryn laıdan tazartý máselesin kóterdi.
Nurjan Nurjigitov mınıstrlik Túrkistan oblysyndaǵy «Qazsýshar» fılıalyna óńirdegi sý qoımalaryn mehanıkalyq tazartý úshin jersnarıadtar beretinin aıtty. Osyndaı jumystardy Qazaqstannyń basqa da oblystarynda júrgizý josparlanyp otyr.
Aıta keteıik, elimizde jyl basynan beri 780 shaqyrym kanal tazartyldy.