Funny Sport: Astanada erekshe sporttyq is-shara ótip jatyr
ASTANA. KAZINFORM – Astanada buqaralyq sportty damytý maqsatynda ekinshi jyl qatarynan Funny Sport jobasy jalǵasyp jatyr, dep jazdy elorda ákimdiginiń resmı saıty.
12-21 qyrkúıek aralyǵynda ótetin jobada qala turǵyndary qalamyzdyń ár túkpirinde florbol, BMX, skeıtbordıng, otbasylyq estafeta, júgirý, aýla oıyndarynda baqtaryn synap, Street Workout, ınklıýzıvti sheberlik sabaqtary boıynsha mamandardan tálim alady. Osy oraıda búgin Qajymuqan kóshesi kópiriniń astyndaǵy Street Hockey alańynda 2011-2012 jyly dúnıege kelgen jasóspirimder florboldan synǵa tústi.
– Funny Sport jobasynyń ótken maýsymyn muz aıdynynda (Cross Ice Hockey) ótkizgen edik. Al bıyl dalada florbol oıynyn uıymdastyrýdy jón kórdik. Atalǵan sporttyń ereksheligi – kez kelgen jerde ótkize berýge bolady. Eń bastysy, tósenish jaqsy bolsa jetkilikti. Bul oıyn Eýropada óte tanymal. Al Qazaqstanda endi ǵana damyp keledi. Oıyn jaǵynan shaıbaly hokkeı men kógaldaǵy hokkeıge qatty uqsas. Aıyrmashylyǵy – bir-birimen soǵysý qaýpiniń tómendigi, - dedi Astana qalasynyń áýesqoı lıgasynyń ókili Abaı Mýkýshkın.
Olımpıada baǵdarlamasyna kirmeıtin komandalyq sport túri beıne bir hokkeıden esh aıyrmashylyǵy joqtaı kórinedi. Alańda 4 oıynshy men 1 qaqpashy bolýǵa tıis. Al shaıbanyń ornyna salmaǵy jeńil kishkentaı dop qoldanylady jáne konkıdiń ornyna sporttyq aıaq kıimmen oınaýy tıis. Alańnyń aýmaǵy da birneshe ese kishkentaı.
ؘ– Bir kúnge jalǵasatyn básekede 10 komanda saıysqa túsip jatyr. Olardy jas ereksheligine baılanysty 2010 jáne 2011 jyldar arasynda jeńimpazdardy jeke-jeke anyqtaımyz. Qatysýshylardyń barlyǵy derlik hokkeıshiler. Olar úshin florbol tańsyq emes. Jattyǵý barysynda da osy oıyndy oınap, taktıkalyq sheberligin arttyrady, - dep túıindedi jarys uıymdastyrýshysy Abaı Mýkýshkın.
Aıta keteıik, byltyrǵy Funny Sport marafonyna 1500-den astam qala turǵyny qatysqan bolatyn. Bıylǵy is-sharalar da kem túspeıtindeı jarqyn ári aýqymdy bolmaq.
Uıymdastyrýshylardyń aıtýynsha, jalpy 1000-nan astam adam qatysady dep josparlanǵan. Sporttyq is-sharalar boıynsha tolyq aqparatty funnysport.asia resmı saıty jáne funnysport.kz Instagram paraqshasynan bilýge bolady.
Aıta keteıik, Anglııanyń Lıverpýl qalasynda World Boxing álem chempıonatynda aǵaıyndy Mahmud (55 keli) jáne Tórehan Sabyrhan (70 keli) top jaryp, el qorjynyna eki altyn medal saldy. Qos birdeı chempıonnyń anasy Meńtaı Ásilova «Jibek joly» telearnasyndaǵy «Búgin LIVE» baǵdarlamasyna suhbat berip, aqtyq syndaǵy áseri men tolqyǵan kóńili týraly aıtyp berdi.