Fýkýsımadaǵy tehnogendik apat saldarynan qalyptasqan ıadrolyq bulttyń Qazaqstanǵa esh áseri bolmaıdy
ASTANA. 16 naýryz. QazAqparat /Jasulan Amanbaıuly/ - Japonııada bolǵan joıqyn zilzala saldarynan, eldegi atom elektr stansasynda apat oryn alǵany týraly álemdik BAQ keńinen habar taratýda.
Osy jaǵdaıǵa oraı búgin «Qazgıdromet» RMK -da baspasóz máslıhaty ótti.
«Fýkýsıma qalasynda bolǵan tehnogendik apat saldarynan qalyptasqan ıadrolyq bulttyń Qazaqstanǵa esh áseri bolmaıdy», - dedi mekeme basshysy Baıan Sazanova jýrnalısterge.
Onyń aıtýynsha, qazirgi ýaqytta Qazaqstan aýmaǵynda radıatsııalyq fon deńgeıin baqylap otyratyn 79 meteorologııalyq ortalyq bar.
«Qazaqstanǵa Fýkýsımadaǵy jarylystyń eshbir zııany bolmaıdy. Sebebi, aýa massasy ádette Batys jáne Reseı óńirlerinen, Túrikmenstan, Iran elderi aýmaǵynan bizge qaraı yǵysady. Degenmen, biz únemi osylaı bolady dep túpkilikti aıta almaımyz. Óıtkeni bul jaǵdaı aýanyń aınalym aǵyndaryna jáne ǵalamdyq ózgeristerge baılanysty»,- dep atap kórsetti B. Sazanova.
