«Fýkýsıma-1» AES-inen radıoaktıvti sý taǵy aqty
ASTANA. QazAqparat - Japonııanyń soltústik-shyǵysyndaǵy apatty «Fýkýsıma-1» AES-iniń operatory TERSO stansanyń besinshi energoblogyndaǵy radıaktıvti sýdyń taǵy aqqandyǵyn jarııa etti, dep habarlady sheteldik BAQ.
TERSO taratqan aqparatqa qaraǵanda, energoblogtyń besinshi qabatynan radıoaktıvti sýdyń aǵýy jergilikti ýaqyt boıynsha senbi kúni saǵat 01.30-da tabylǵan. Aldyn ala baǵalaý boıynsha tógilgen sý shamamen 100 lıtrdi quraıdy.
Radıoaktıvti sýdyń óńdelgen ıadrolyq otyn saqtalatyn basseıindi salqyndatý úshin suıyqtyq aǵatyn qubyrdyń gıdrotehnıkalyq qaqpaǵynan tamshylaǵany belgili bolyp otyr. Qazirgi ýaqytta basseıindegi temperatýra 25,2 gradýsty quraıdy.
Esterińizge sala keteıik, osy aıdyń basynda óńdelgen ıadrolyq otyn saqtalatyn basseıindi salqyndatý júıesi radıoaktıvti sýdyń aǵýy saldarynan toqtatylǵan edi. Ol kezde kompanııa ne bári eki kúnniń ishinde júıedegi aqaýdy qalpyna keltirgen bolatyn.
