FýdMaster kompanııasynda eshqandaı zańsyz áreketter oryn alyp otyrǵan joq - kompanııanyń Bas dırektory

Bul kompanııanyń negizgi maqsaty. Ónimder barlyq veterınarlyq, sanıtarlyq-epıdemıologııalyq jáne tehnıkalyq qadaǵalaýdyń memlekettik uıymdarynyń tekserýinen ótken jáne qoldaý tapqan. Bul týraly búgin kompanııanyń Esik qalasynda ornalasqan sút óńdeý zaýytynda ótken "ashyq esik" kúninde kompanııanyń Bas dırektory Aıda Saparǵazınova málimdedi, dep habarlaıdy QazAqparat.

Esterińizge sala keteıik, osydan 4 kún buryn "FýdMaste" kompanııasy Qazaqstan azamattarynyń: aýylsharýashylyǵy taýar óndirýshileri, jaldamaly jumysshylar men tutynýshylardyń quqyqtary men múddelerin óreskel buzýda" degen taqyrypta baspasóz máslıhaty ótken bolatyn. Onda FýdMaster kompanııasynyń burynǵy qyzmetkerleri kompanııanyń ónimderi tutynýshylarǵa qaýip tóndiredi dep málimdep, laıyqty mal dárigerlik -sanıtarlyq baqylaýdan ótkizilmeıdi, baqylaý sapasyz, ónim óndirýde untaq qurǵaq sútti paıdalaný saldarynan ónim sapasy kúrt tómendedi, kompanııa aýsyl derti shyqqan kezde Qyrǵyzstannan sút satyp aldy jáne jumysshylardy jábirleýde degen bolatyn.

Búgin osy máselege oraı óz pikirin bildirgen Aıda Saparǵazınova, mundaı zańsyz áreketterdiń joqtyǵyn aıtady. Onyń aıtýynsha, ónim óndirý qatań talap pen zań sheńberinde júrgiziledi. «Bizde eshbir tutynýshynyń densaýlyǵyna jáne ómirine qaýip tóndiretin jaǵdaı tirkelgen joq. Barlyq ónimder respýblıkada bekitilgen sút taǵamdarynyń sapasy men zalalsyzdyǵyna qoıylatyn qatań talaptarǵa sáıkes óndiriledi. Al, bizde júrgiziletin táýelsiz zerthanalardyń tekserýleri, jyldan jylǵa bizdiń ónimderimizdiń álemdik standartqa saı ekendigin dáleldep keledi», dep atap ótti Aıda Saparǵazınova.

Ol tek belgili bir máseleler boıynsha ǵana qıyndyqtar týyndap otyrǵandyǵyn aıtady. Máselen, Úkimettiń sońǵy usynysyna sáıkes, kompanııa deldaldarmen jumysty toqtatyp, tikeleı fermerlermen jumys isteýge kóshken. Osyǵan oraı kompanııanyń deldaly - jeke kásipker «Fırstova» syndy fırmalar FýdMaster atyna túrli qaralaýlar júrgizýde. «Olar bul málimdemelerimen bizdiń atymyzǵa kir keltirýde. Biz sondyqtan ol fırmany sotqa beremiz», dep atap ótti kompanııa dırektory. Ol sonymen qatar, búgin Almatyda belgisiz adamdar balabaqshalarǵa «FýdMaster kompanııasynyń sapasy tómen sút ónimderin almańyzdar» dep jazylǵan paraqshalar taratylyp jatqandyǵynan habardar etti.

Bul jaǵdaıǵa ol: «Mundaı is-áreketti biz naǵyz arsyz básekelestik jáne zań buzýshylyq dep bilemiz. Biz quqyq qorǵaý oryndaryna bul zańsyz aktsııanyń artynda kim turǵanyn, uıymdastyrýshysy kim ekenin anyqtaý týraly ótinish bildirdik», dedi. Onyń aıtýynsha, qazirgi ýaqytta bul is boıynsha tekserý jumystary júrgizilýde. «Bizdiń ashyq ekendigimizdi kórsetý úshin jáne jala jabýshylyqty teriske shyǵarý úshin zaýytta ashyq esik kúnderin ótkizýdemiz. Bul sharalardy ár kelýshi bizdiń baqylaý protsedýralarymyzdy óz kózderimen kórip senimdi bola alady», dedi zaýyt dırektory Gúlshat Muhametjanova.