«FýdMaster» kompanııasy múmkindigi shekteýli balalarǵa arnaıy trenajerler tabys etti
ALMATY. 21 jeltoqsan. QazAqparat /Ádilet Musahaev/ - Múmkindigi shekteýli balalardy bilim úderisine tartýda deneshynyqtyrýdyń mańyzy zor.
Bul jaıynda búgin «Balalardyń áleýmettik beıimdeý ortalyǵynyń» tóraǵasy Elena Kolmogorova Dúnıejúzilik múgedek balalar kúnine oraı Almatyda ótken dóńgelek ústel barysynda málim etti.
Onyń aıtýynsha, Qazaqstanda ınklýzıvti bilim júıesi endi ǵana qolǵa alynyp jatyr jáne osy tóńirektegi baǵdarlamalar qaıyrymdylyq sharalarynan túsken qarajat arqasynda iske asýda. «Qazirgi tańda osy baǵdarlamalar máselesi ózekti bolyp otyr, alaıda ony sheshý qıyn da emes. Tek múgedek balalardyń ózdiginen qozǵalyp, otyryp-turýyna jaǵdaı jasaý kerek. Balalar kóp qozǵalǵan saıyn múmkindikteri arta túsedi, ıaǵnı bala mektepke baryp, qoǵammen aralasa bastaıdy», -deıdi E. Kolmogorova.
Elimizde 145 myńnan astam múgedek bala bar, bul 16 jasqa deıingilerdiń 3,5 paıyzyn quraıdy eken.
Jıyn barysynda elimizdiń 6 saýyqtyrý mekemesine jáne 11 múmkindigi shekteýli balaǵa arnaıy trenajer men deneni ońaltýǵa arnalǵan kostıýmder tabys etildi. Bul syılyqtar "FýdMaster" kompanııasynyń múgedek balalardy qoldaýǵa arnalǵan aktsııasynyń nátıjesinde alynǵan, ıaǵnı ár satylǵan aırannan 1 teńge qaıyrymdylyqqa aýdarylyp otyrǵan.
"Mundaı jabdyqtarǵa qoljetimdilik artqan saıyn balalardy aıaqtan turǵyzý jyldamdaı túsedi. Múgedek balalarmen jumys isteıtin barlyq mekeme qyzmetkerleri atynan mundaı aktsııa ótkizip, bastama kótergen kompanııaǵa alǵysymdy bildiremin", - deıdi Ulttyq túzetý pedagogıkasy ǵylymı-tájirıbelik ortalyǵynyń jetekshisi Baǵlan Halyqova.
