FTX krıptovalıýtasynyń negizin qalaýshy alaıaqtyq boıynsha aıypty dep tanyldy

Nıý-Iork federaldyq sotynyń alqabıleri Cem Bankman-Frıdti alaıaqtyq pen aqsha jymqyrý maqsatynda qylmystyq kelisim jasaǵany úshin aıypty dep tanydy. Eks-mıllıarder sot tyńdalymy kezinde «úlken qatelik» ketkenin, zańdy ádeıi buzbaǵanyn aıtty. Kazinform bul týraly Euronews basylymyna silteme jasap habarlaıdy. 

Byltyr bankrotqa ushyraǵan FTX krıptovalıýta bırjasynyń negizin qalaǵan Sem Benkman-Frıd aıyptaýdyń barlyq jeti bóligi boıynsha, onyń ishinde alaıaqtyq pen aqsha jymqyrý maqsatynda qylmystyq kelisim jasaǵany úshin kináli dep tanyldy. 31 jastaǵy eks-mıllıarder ómir boıyna bas bostandyǵynan aıyrylýy múmkin. 

Prokýrorlardyń pikirinshe, ol ınvestorlardan 10 mlrd dollarǵa deıin aqsha urlaý shemasyn jasaǵan. Alqabıler klıentterdiń depozıtteri FTX basshysyna tıesili Alameda Research hedj-qoryna qaryzdardy óteý jáne sán-saltanatty jyljymaıtyn múlkin satyp alýǵa jumsalǵanyn anyqtady.

«Bul AQSh tarıhyndaǵy eń iri qarjy alaıaqtyǵynyń biri», - dep málimdedi Manhetten prokýrory Demıan Ýılıams.

Jaza kelesi jyly naýryzda taǵaıyndalady, Benkman-Frıd kinásin moıyndaǵan joq.

Buǵan deıin FTX krıptovalıýta bırjasy AQSh-ta sot protsedýrasy arqyly klıentterine aqshasyn qaıtarýdyń amalyn izdep, bankrottyǵyn jarııalaǵanyn jazǵan bolatynbyz.