FTB-niń burynǵy basshysy Trampqa qaýip tóndirdi dep aıyptaldy
ASTANA. KAZINFORM — FTB-niń burynǵy dırektory Djeıms Komı áleýmettik jelilerde jarııalaǵan jazbasy úshin sot aldynda jaýap berdi. Bılik bul jazbany AQSh prezıdenti Donald Trampqa qaýip tóndirý retinde baǵalaǵan, dep habarlaıdy BBC.
FTB-niń burynǵy basshysy 29 sáýirde bılikke óz erkimen berilip, sotqa keldi. Tergeýge sebep bolǵan jaǵdaı — onyń AQSh-ta úlken rezonans týdyrǵan Instagram jelisindegi jazbasy.
Jarııalanymda «86 47» sany jazylǵan. Tsıfrlar ulýdyń qabyqtarynan tizilgen.
Prokýrorlardyń aıtýynsha, aǵylshyn tilindegi aýyzeki qoldanysta «86» sózi «qutylý» nemese «joıý» degen maǵynany bildirýi múmkin, sondyqtan olar muny 47-shi prezıdentke qatysty zorlyq-zombylyqqa jasyryn ıshara retinde qarastyryp otyr.
Djeıms Komı aıyptaýlardy joqqa shyǵardy. Ol bul sandardyń mundaı maǵynasy bar ekenin bilmegenin jáne jazbada eshqandaı jasyryn nıet bolmaǵanyn aıtty. Onyń pikirinshe, is saıası sıpatqa ıe.
Bul AQSh Ádilet mınıstrliginiń burynǵy basshy ústinen qylmystyq aıyp taǵyp otyrǵan ekinshi jaǵdaı.
Djeıms Komı qatysqan Vırdjınııadaǵy qysqa sot otyrysynda ol eshqandaı málimdeme jasaǵan joq. Onyń advokaty Patrık Fıtsdjerald qorǵaý tarapy isti saıası málimdemeleri úshin kek alý retinde qýdalaý dep dáleldeýge tyrysatynyn aıtty.
Bas prokýror Todd Blansh istiń saıası astary bar degen boljamdardy joqqa shyǵaryp, prezıdentke baǵyttalǵan qaýip-qaterlerdiń aýyr qylmys ekenin atap ótti.
Qoǵamdyq reaktsııadan keıin Komı jarııalanymyn óshirdi. Keıin ol sýretten tek serýen kezinde kórgen «ulý qabyqtarynyń qyzyqty ornalasýyn» ǵana baıqaǵanyn túsindirdi.
Sot ony qosymsha shartsyz bosatty. Kelesi sot otyrysy Soltústik Karolına shtatynda ótedi dep josparlanǵan. Komı aıyptaýǵa qarsy shyǵatynyn málimdedi.
Aıta keteıik, FTB qupııa zerthana qyzmetkerleriniń jumbaq ólimin tergep jatyr.
