Frıstaıldan Qazaqstan quramasy 2022 jylǵy Olımpıadaǵa daıyndyqty bastady
ALMATY. QazAqparat - Frıstaıl-mogýldan Qazaqstan quramasy tórt jyldyq olımpıadalyq tsıklge jol ashatyn jańa maýsymǵa daıyndyqty bastady, dep habarlaıdy QazAqparat tilshisi.
«Alǵashqy jıyn Rıdderdegi «Ridderhütte» kesheninde boldy. Oqý-jattyǵý jıyndary eki kún buryn aıaqtaldy. Bapkerler shtaby onyń qorytyndylaryna kóńili tolatynyn aıtyp otyr. Kelesi jıyn da ShQO-da bolady, quram da ózgermeıdi. Sheteldegi alǵashqy jıyn 20 shildede Kıevte ótýi tıis, biraq qazir UOK-pen qarjy máselesinde bir mámilege kelý qajet bolyp tur», - deıdi Qazaqstannyń frıstaıl-mogýl quramasynyń jańadan taǵaıyndalǵan bas bapkeri Elena Krýglyhına.
Aıta keteıik, ulttyq quramada ózgerister boldy. Quramanyń sapy keńeıip, Aıaýlym Ámirenova, Aleksandr Gebert, Oleg Tsınn, Sergeı Romanov, Konstantın Gorlachev sııaqty jas sportshylar qatarǵa qosylǵan.
Bıylǵy maýsymdaǵy basty jarystardyń biri - Amerıkanyń Park-sıtı qalasynda 1-10 aqpanda ótetin álem chempıonaty. Biraq qurama komanda bar kúshti 2022 jyly ótetin Beıjiń Olımpıadasyna jumsaǵaly otyr.
