Frıstaıldan álem kýboginiń kezeńi Shymbulaqta ótedi
Kelesi jyly 8-10 naýryz kúnderi mogýl jáne shańǵy akrobatıkasy boıynsha álem kýboginiń kezeńi «Shymbulaq» taý-shańǵy kýrortynda ótedi, dep habarlaıdy Kazinform.
«Bizde álem kýboginiń kezeńderi únemi ótip turady. Biz sondaı-aq bul jerde frıstaıldan álem chempıonatyn ótkizgenbiz. Men barlyq jankúıerlerdi bizdiń sportshylardy belsendi túrde qoldaýǵa shaqyrǵym keledi. Bizdiń sportshylar búgingi kúni kýboktyń basqa kezeńderinde qatysyp júr. Olar maqtana alarlyqtaı jetistikteri bar. Frıstaılshy Anastasııa Gorodko buǵan deıin kúmis medalge ıe bolǵan, ótken maýsymda Pavel Kolmakov frıstaıldan álem kýboginiń úıdegi fınaldyq kezeńinde ekinshi oryn alǵan», - dedi «Shymbulaq» taý-shańǵy kýrortynyń kommertsııalyq dırektory Vasılıı Podkorytov taý-shańǵysy maýsymynyń ashylý saltanatynda.
«Shymbulaq» taý-shańǵy kýrortynyń dırektory Rınat Ábdirahmanov frıstaıl jarysy Qazaqstanda alǵash ret 2019 jyly ótkenin aıtty. Ári sol kezde álem kýboginiń kezeńderi únemi ótip turýy kerek dep sheshilgen edi. Halyqaralyq shańǵy jáne snoýbord federatsııasy (FIS) tarapynan belgili bir tehnıkalyq talaptar qoıylǵan.
«Talaptar kýrortqa, qar shashý júıesi men aspaly jolǵa qatysty boldy. Biz onyń barlyǵyn oryndadyq. Bul shara sondaı-aq jyl saıyn FIS kúntizbesine enedi. Odan bólek, bizdiń mamandar tehnıkalyq delegat bolý úshin 2021 jyldan bastap FIS mektepterinde bilim alady. Kelesi jyly biz Qazaqstannan shyqqan eki delegatqa qurmet kórsetetin bolamyz. Olar tek Qazaqstanda ǵana emes, álem elderinde ótetin jarystardy ótkizip, uıymdastyryp, olarǵa tórelik etetin bolady», - dedi Rınat Ábdirahmanov.
Ol sondaı-aq bıyl jeltoqsan aıynda shańǵy akrobatıkasy boıynsha álem kýboginiń kezeńi ne sebepti ótpeıtinin túsindirdi. Rınat Ábdirahmanov ótken jyly bul másele boıynsha FIS-pen kelissózder júrip jatqanyn aıtqan.
«Bizdiń rasymen jeltoqsan aıynda shańǵy akrobatıkasy boıynsha, naýryz aıynda mogýl boıynsha álem kýboginiń kezeńin ótkizý týraly oıymyz bolǵan. Biraq aýa raıy qolaısyz bola ma dep qoryqtym. Ókinishke qaraı bıyl qys kesh keldi ári jyly bolyp tur. Bıyl bul sharany ótkize almaýshy edik jáne odan bas tartýǵa týra kelýshi edi... Qazir ony aqpan aıyna aýystyrý máselesin talqylap jatyrmyz. Qańtar aıynda komıssııa otyrysy ótedi, onda 2025 jyldyń kúntizbesi talqylanady. Bul rette aqpan aıynda shańǵy akrobatıkasy boıynsha, naýryz aıynda mogýl boıynsha Álem kýboginiń kezeńi ótýi tıis», - dedi spıker.
Eske salaıyq, ótken maýsymnyń 17-19 naýryz kúnderi mogýl jáne shańǵy akrobatıkasy boıynsha álem kýboginiń fınaldyq kezeńi «Shymbulaq» kýrortynda ótti. Jarysqa álemniń 14 elinen sportshylar qatysty. Ol kezde qazaqstandyq Pavel Kolmakov kúmis júldeni, al Janbota Aldabergenova 6-oryndy ıelengen edi.
Sondaı-aq ótken maýsymda Shymbulaqta mogýlǵa arnalǵan «Sýhoı Log» jańa trassasy ashylǵan bolatyn.
Aıta keteıik, frıstaıldan álem kýbogynyń kezeńderi 1980 jyldan bastap Halyqaralyq shańǵy federatsııasynyń (FIS) qoldaýymen jyl saıyn ótip kele jatqan jarystar. Oǵan Aýstrııa, Aýstralııa, Ulybrıtanııa, Germanııa, Norvegııa, Italııa, AQSh, Kanada, Japonııa, Shvetsııa, Shveıtsarııa, Fınlıandııa, Qazaqstan jáne basqa da elderdiń eń myqty sportshylary qatysady.
