Frıstaıldan ÁCh: qazaqstandyqtar aralas komandalar saıysynda úzdik nátıje kórsetti
ASTANA. KAZINFORM – Aıroloda (Shveıtsarııa) frıstaıldan jasóspirimder arasynda álem chempıonaty aıaqtalýǵa jaqyn.
Kezekti jarys kúni frıstaıl-akrobatıkadan aralas komandalar arasynda saıys ótti.
Ulttyq olımpıadalyq komıtettiń málimetinshe, bul baǵdarlamada Qazaqstan atynan eki quram óner kórsetti. Ardana Mahanova, Asylhan Asan jáne Dinmuhammed Raıymqulov 212,78 upaı jınap, tórtinshi oryn aldy.
Al Raıana Mahanova, Roman Pogosıan jáne Adelına Ýmýrzakova 189,50 upaımen jetinshi orynǵa turaqtady.
Jarysta Ýkraına quramasy 247,50 upaımen jeńiske jetti. Kanada quramasy 243,04 upaı jınap, ekinshi oryn aldy. AQSh komandasy 224,54 upaımen qola júldege ıe boldy.
Aıta keteıik, buǵan deıin jekeleı synda Asylhan Asan jasóspirimder arasynda álem chempıonatynyń jeńimpazy atansa, Dinmuhammed Raıymqulov Qazaqstan qorjynyna kúmis medal salǵan edi.
