Frılanserlerdiń qyzmeti tsıfrlyq formatqa ótkizilmek
«Búgingi kúni eńbek naryǵynda 300 myńǵa jýyq ózin-ózi jumyspen qamtyǵandar azamattyq kelisimsharttar negizinde jumys atqarýda. Tapsyrys berýshiler men oryndaýshylardyń arasyndaǵy qarym-qatynas - kúrdeli protsess. Sondaı-aq, sheteldik jumys kúshiniń quramynda 60 paıyzǵa jýyǵy jumysshy mamandyqtary boıynsha tartylady. Osy máselelerdi eskere otyryp birinshiden, mınıstrlik frılanserlerdiń qyzmetin tsıfrlyq formatqa ótkizý maqsatynda «platformalyq jumys» elektrondyq servısin ázirleıdi. Bul ártúrli platformalarda óz betinshe jumys isteıtin azamattardyń qyzmetin ońaı tirkeýge, qajet mamandardy tez arada tabýǵa, eńbek quqyqtaryn qorǵaýǵa jáne tapsyrys berýshilermen qarym-qatynasty resmı túrde rásimdeýge múmkindik beredi»,- dedi mınıstr.
Onyń atap ótýinshe, ekinshiden, 3 jáne 4 sanattar boıynsha sheteldik jumys kúshin tartýǵa arnalǵan kvota 4,7 myń adamǵa qysqartylady. Úshinshiden, jańa jumys oryndarynyń qurylýy óńirlik jumyspen qamtý kartalaryn ózektendirý jáne aqparattyq júıeni turaqty túrde jańartý arqyly monıtorıngilenetin bolady.
«Atalǵan is-sharalar halyqtyń jumyspen qamtylý deńgeıin arttyrýǵa jáne ishki eńbek naryǵyn qorǵaýǵa múmkindik beredi», - dedi Serik Shápkenov.