Frılanserler «nıetsiz adamdarǵa» jatady - Darhan Káletaev
ASTANA. QazAqparat - QR Qoǵamdyq damý mınıstrligi oqý-bilimge qulyqsyz ári naqty ustanymy joq jastardyń birneshe tobyn anyqtady. Olardyń ishinde frılanserler de bar, dep xabarlaıdy QazAqparat tilshisi.
Mınıstr Darxan Káletaevtyń aıtýynsha, birinshi topqa áleýmettik qoldaý júıesimen qamtylmaǵandar jáne ata-anasynyń qamqorlyǵynda otyrǵandar kiredi.
«Saıası jaǵynan bul jastar memleketke nıettes, alaıda jergilikti deńgeıde synı kózqarasta bolýy múmkin. Jas ólshemi boıynsha kishi top - 18-22 jastyń aralyǵy, orta top - 22-24 jas aralyǵy, eresekter toby - 25-29 jas aralyǵy. Jalpy, jumyspen, oqýmen qamtylǵan jastardyń jeti tobyn ataýǵa bolady. Birinshi toby - asyraýda otyrǵandar. Olardyń bilimi men tájirıbesi bar. Biraq oqý men jumysty jalǵastyrýǵa yntasy joq. Ekinshi top - jas áıelder, jas balalary bar, jalǵyzbasty analar, sonyń ishinde erte ana bolǵandar. Úshinshi top - frılanserler, erkin aqsha tabýdy, júıesiz jumys pen kóleńkeli sektordy artyq sanaıtyn kezdeısoq tabyspen kún kóretinder. Tórtinshi top - aýyl jastary. Olar - biliktiligi men tájirıbesi joq, qosalqy sharýashylyqqa tartylǵandar. Besinshi top - múmkindigi shekteýli jandar. Altynshy top - áleýmettik jaǵdaıy tómen otbasynan shyqqandar. Olarda oqýdy jalǵastyrýǵa nıet bar. Biraq múmkindigi joq. Al jetinshi toby - túrmeden shyqqandar, esirtki men ishimdikke táýeldi jastar», - dedi D.Káletaev Úkimettiń búgingi otyrysynda.
Aıta keteıik, búgin QR Qoǵamdyq damý mınıstri Darxan Káletaev jumyssyz jastar máselesin kóterdi. Onyń aıtýynsha, memlekettik basqarý salasynda oqý-bilimge qulyqsyz, saıası jáne azamattyq belsendiligi tómen, jaýapkershikti óz moınyna alýǵa nıetsiz jastarǵa qatysty naqty bir termın bar.
«Qazaq tilinde bul termın aǵylshyn nusqasyn qaıtalap otyr. Alaıda qazaq paıymyna salatyn bolsaq, bul topty «nıetsiz» dep bir sózben ataýǵa bolatyn shyǵar. Ondaı minez-qulyq, kóp jaǵdaıda, jastardyń qoǵamnan qashýyna ákelip soqtyrady. Olar áleýmettik ortada ózderin kereksiz den sanaıdy. Sýıtsıd pen devıatsııa sııaqty problemalardyń barlyǵy osylan týyndaıdy. Otbasy qundylyqtary buzylady», - dep atap kórsetti D.Káletaev.
