Frıdrıh Merts parlament qoldaýyna ıe bola almady

ASTANA. KAZINFORM — Hrıstıan-demokratııalyq jáne hrıstıan-áleýmettik odaqtyń (HDO/HÁO) konservatıvti blogynan kandıdat Frıdrıh Merts Býndestagtaǵy daýys berýdiń birinshi týrynda kantsler bolyp saılaný úshin kópshilik daýys jınaı almady, dep habarlaıdy Kazinform tilshisi.

Hrıstıandyq demokrattardyń (HDO) kóshbasshysyna 630 delegattyń 310-y ǵana daýys berdi. Ol qajetti absolıýtti kópshilikti – 316 daýysty jınaı almady. Parlament depýtattarynyń 307-si qarsy daýys berdi, taǵy úsheýi qalys qaldy.

6 mamyrda HDO/HÁO kóshbasshysy úkimet basshysy bolyp taǵaıyndalyp, Germanııa Federatıvtik Respýblıkasynyń mınıstrler kabıneti jumysqa kirisedi dep kútilgen bolatyn. Úkimettik koalıtsııa parlamentte 12 oryndyq basymdyqqa ıe jáne F.Mertstiń «HDS», olardyń Bavarııadaǵy odaqtastary – Hrıstıan-áleýmettik odaq (HSS) jáne sotsıal-demokrattar (SDPG) partııalarynan quralǵan.

Osydan keıin parlamenttik fraktsııalarǵa keńesý múmkindigin berý úshin otyrys jabyldy.

F.Mertstiń ekinshi jáne úshinshi ret saılaýǵa túsýge áreket jasaýy múmkin dep sanalady. Sońǵy daýys berýde oǵan tek salystyrmaly kópshilik daýys jınaý qajet, al ol birinshi týrda buǵan qol jetkizgen.

Buǵan deıin Germanııada HDO/HÁO konservatorlary men sotsıal-demokrattary koalıtsııalyq kelisimge qol qoıǵany habarlandy. Onda olar kóshi-qondy shekteýge, bızneske túsetin salyq júktemesin azaıtýǵa jáne qorǵanys qabiletin arttyrýǵa ýaǵdalasty.