Freddı Merkıýrıdiń Londondaǵy úıi 38 mıllıon dollarǵa satýǵa qoıyldy
LONDON. KAZINFORM – Londonnyń bedeldi Kensıngton aýdanyndaǵy ataqty Queen tobynyń ánshisi Freddı Merkıýrıge tıesili Garden Lodge saraıy 30 mıllıon fýnt sterlıngke (38 mıllıon dollar) satylýy múmkin.
AZERTADJ The Daily Telegraph basylymyna silteme jasap habarlaýynsha, 1907 jyly salynǵan úıdiń kólemi men shemasy týraly derekter «qupııalylyq maqsatynda» jarııa etilmeıdi. Dál sol sebepti ony satý týraly habarlandyrý ınternette jarııalanǵan joq, biraq Knight Frank jyljymaıtyn múlik agenttigi áleýetti satyp alýshylarmen jeke kelissózder júrgizýge daıyn.
Úıdi kórýdi ǵana qalaıtyn jankúıerlerdi toqtatý úshin olardyń tólem qabilettiligi muqııat tekseriledi dep kútilýde. Qazirgi ýaqytta ashana men dálizde túsirilgen ıntererdiń eki fotosýreti ǵana jarııalanǵan.
Merkıýrı 1980 jyly satyp alyp, 1991 jyly qaıtys bolǵanǵa deıin turǵan úıin Queen jetekshisi ómiriniń mahabbaty jáne áıeli Merı Ostınge mura etti. 2023 jyldyń sońynda 72 jastaǵy Ostın mýzykanttyń 1500 jeke zattary toptamasyn aýktsıonǵa qoıdy, endi ol eki balasymen 30 jyldan astam turǵan úıin satýǵa sheshim qabyldady.
Balalardyń ákesi sýretshi jáne kásipker Pırs Kemeronmen Ostın 1990 jyldan 1993 jylǵa deıin resmı nekede bolǵan.
Top jankúıerleriniń kóptegen jazýlary men syzbalary qaptaǵan, saraıdyń aınalasyndaǵy baqshany qorshap turǵan kirpish qabyrǵadaǵy esik ótken jyly Sotheby's aýktsıonynda shamamen 413 myń fýnt sterlıngke (524 myń dollar) satylǵan.
Queen týraly
Brıtandyq topta 15 stýdııalyq albom bar, olardyń jalpy taralymy 100 mıllıon danaǵa jaqyndaıdy. Queen-niń sońǵy stýdııalyq albomy 1995 jyly shyqty.
Frontmenniń qaıtys bolýyna jáne basıst Djon Dıkonnyń ketýine qaramastan, Queen áli de jańartylǵan qurammen belsendi óner kórsetip keledi. Toptyń eń tanymal ánderi: We Are the Champions, Bohemian Rhapsody, We Will Rock You, The Show Must Go On, I Want Break Free, A Kind of Magic.
2001 jyly top Rok-n-roll Dańq Zalyna engizildi, al 2002 jyly mýzykadaǵy jetistikteri úshin toptyń qurmetine Gollıvýd Dańq alleıasynda juldyz ornatyldy.
2018 jyly Merkıýrıdiń ómiri týraly baıandaıtyn fılm Bohemian Rhapsody jaryqqa shyǵyp, tórt Oskar syılyǵyn jeńip aldy.
Basty akter, amerıkalyq Ramı Malektiń akterlik sheberligi de altyn statýetkamen marapattaldy.
