Frantsýzdyq strımerdiń tikeleı efırde qaıtys bolýy: prokýrorlar tergeý júrgizip jatyr
ASTANA. KAZINFORM — Nıtstsa prokýratýrasy dúısenbi, 18 tamyzda 46 jastaǵy strımer Rafael Greıvenniń «tikeleı efır kezinde» qaıtys bolǵanyn rastady, dep habarlaıdy Euronews.
Paıdalanýshylarǵa Jan Pormanov nemese JP búrkenshik esimderimen belgili bolǵan Greıven Narýto jáne Safın esimdi seriktester ony birneshe saǵat boıy fızıkalyq jáne psıhologııalyq zorlyq-zombylyqqa ushyratqan beınelerdi jelide jarııalaý arqyly aqsha tapty. Áńgime tunshyqtyrý, uryp-soǵý, sýyq sý quıý jáne balaǵattaý týraly bolyp otyr.
Kontent Lokal arnasynda kórsetildi, ony júzdegen myń jazylýshy kórdi.
— Iá, bul trash-kontent boldy, biraq biz ol úshin tolyq jaýapkershilikti óz moınymyzǵa aldyq. Kontent qatty baqylanǵan, stsenarııi jazylǵan edi, biz ony áserli etip kórsetýge tyrystyq. Bul oıyn-saýyq pen strımıngtiń bir bóligi boldy. Biz mundaı nárse bolady degen oıdan óte alys edik, — dep túsindirdi tikeleı efırge qatysqan Narýtonyń aǵasy Gven.
Beınejazbany kórgen paıdalanýshylar strımerlermen ózara árekettesip, olarǵa qaıyrymdylyq turǵyda qarajat usyna aldy. Túsikintemelerdi oqyǵanda, kórermenderge múmkindigi shekteýli adamdardy balaǵattap, qatygezdik tanytýdyń bul mehanıkasy unaǵan sııaqty.
- Nıtstsanyń sot polıtsııasy qazirdiń ózinde «kóptegen materıal men beınejazbalardy tárkileýdi» júzege asyrdy jáne sol kezde bolǵan adamdardan birneshe jaýap aldy. Qazirgi kezeńde «ólim sebebi týraly» qorytyndy jasalǵan joq, — dep naqtylady prokýratýra.
Tikeleı efırge qatysqan Narýto men Safın qamaýǵa alynyp, keıin bosatyldy, túsirý quraldary tárkilendi.
Frantsııanyń balalar isteri jónindegi joǵarǵy komıssary Sara El-Haırı JP ólimi «qorqynyshty» bolǵanyn aıtty.
— Platformalarǵa bizdiń balalarymyz zorlyq-zombylyqqa ushyramaýy úshin onlaın-kontentti retteýde úlken jaýapkershilik júkteledi. Men ata-analardy óte qyraǵy bolýǵa shaqyramyn, — dedi ol.
Mınıstrdiń Tsıfrlyq tehnologııalar jónindegi orynbasary Klara Shappa X-te bul «absolıýtti qorqynyshty» jáne áleýmettik jelilerde zorlyq-zombylyq beıneleriniń jalpy taralýyn aıyptady.
