Frantsýzdar janarmaı baǵasynyń qymbattaýyna baılanysty alys saparlardan bas tartty
ASTANA. KAZINFORM — Irandaǵy jaǵdaı men Ormýz buǵazynyń jabylýyna baılanysty janarmaı baǵasy sharyqtap ketti. Osynyń áserinen frantsýzdar mamyr merekelerinde alys saparlardan bas tartty, dep jazdy TASS.
Frantsııalyqtar mamyr aıyndaǵy uzaq demalysta úıine jaqyn jerde demalýdy tańdady. El ishindegi qonaqúı nómirlerin brondaý ótken jylmen salystyrǵanda 15%-ǵa artqan.
BFMTV atap ótkendeı, mundaı úrdisten jergilikti bıznes paıda kórip otyr.
1 mamyr — Frantsııada Eńbek kúni, al 8 mamyr — fashızmnen azat etý kúni retinde atap ótiledi.
Arnanyń málimetinshe, Frantsýzdar aldaǵy jazǵy demalysta da alys saparlardan bas tartýdy josparlaǵan. Olardyń 74%-y Frantsııa ishinde qalýdy kózdeıdi.
Ormýz buǵazynyń jabylýy jáne jetkizilimdegi irkilister saldarynan Frantsııada benzın baǵasy shamamen 19%, al dızel otyny 36% qymbattaǵan. Dızel baǵasy janarmaı beketterinde lıtrine 2,5 eýroǵa deıin jetip, sońǵy 20 jyldaǵy eń joǵary deńgeıge shyqqan.
Aıta keteıik, Iranda áskerı qaqtyǵys bastalǵannan beri AQSh-ta benzın baǵasy 30%-dan astamǵa qymbattady.
