Frantsýzdar men portýgaldyqtar arzan janarmaı úshin Ispanııaǵa baryp júr
ASTANA. KAZINFORM – AQSh pen Izraıldiń Iranǵa qarsy shabýylynan keıin 28 aqpannan beri jalǵasyp kele jatqan jahandyq energetıkalyq daǵdarys aıasynda Frantsııa men Portýgalııanyń shekaralas aımaqtaryndaǵy turǵyndar arzan janarmaı úshin Ispanııaǵa bara bastady, dep habarlaıdy Anadoly.
Olar Ispanııa úkimetiniń baǵany tómendetý sharalaryn paıdalanyp otyr.
Taıaý Shyǵystaǵy qaqtyǵys saldarynan sońǵy bir aıda Ispanııada janarmaı baǵasy shamamen 20 paıyzǵa ósken. Alaıda 20 naýryzda qabyldanǵan úkimettik jarlyq 22 naýryzdan bastap kúshine enip, baǵa tómendeı bastady.
Ispanııalyq BAQ habarlaýynsha, janarmaıǵa salynatyn qosylǵan qun salyǵynyń 21 paıyzdan 10 paıyzǵa deıin tómendeýi benzın men dızeldiń arzandaýyna áser etken. Bul kórshi Frantsııa men Portýgalııa turǵyndarynyń da qyzyǵýshylyǵyn arttyrdy.
Málimetterge sáıkes, Portýgalııa men Frantsııanyń shekaralas aımaqtaryndaǵy júrgizýshiler Ispanııada janarmaı quıǵanda bir baktan shamamen 20 eýro únemdeıdi.
Ispanııanyń Frantsııamen soltústik-shyǵystaǵy jáne Portýgalııamen batystaǵy shekaralarynda kólik qozǵalysy kúsheıip, janarmaı quıý beketterinde keıde kezek paıda bolyp otyr.
Frantsııada dızel otynynyń baǵasy lıtrine shamamen 2,12 eýro, benzın 1,99 eýro bolsa, Ispanııada úkimet sharalarynyń arqasynda dızel 1,80 eýroǵa, al benzın 1,62 eýroǵa deıin arzandaǵan.
«Munda janarmaı quıý áldeqaıda tıimdi»
Kórshi Portýgalııadan Ispanııanyń Fýentes-de-Onoro qalasyna janarmaı quıý úshin keletin portýgaldyq Aýrelıý Pereıra óz pikirin aıtty.
— Ispanııamen aıyrmashylyq lıtrine shamamen 20 tsent. Munda janarmaı quıý áldeqaıda tıimdi, — dedi ol.
Osy qaladaǵy janarmaı beketteriniń bir qyzmetkeri Horhe Kosta «bul beketterdiń klıentteriniń 95 paıyzy — portýgaldyqtar. Buryn olar bir baktan shamamen 10 eýro únemdeıtin, qazir bul aıyrmashylyq odan da artty, sondyqtan jıi keledi» dep aıtty.
Sonymen qatar tutynýshylar qaýymdastyqtary úkimet sharalaryna qaramastan Ispanııada janarmaı baǵasy ótken jylmen salystyrǵanda aıtarlyqtaı óskenin atap ótedi.
Atap aıtqanda, dızel kóligin tolyq toltyrý quny qazir bir jyl burynǵymen salystyrǵanda shamamen 19 eýroǵa qymbat.
Aıta ketelik Germanııada janarmaı baǵasyn kúnine bir ret qana kóterýge ruqsat berilýi múmkin ekenin jazǵan edik.
