Frantsýzdar qazaqtyń jylqy etine qyzyǵyp otyr

ASTANA. KAZINFORM — Aýyl sharýashylyǵy mınıstri Aıdarbek Saparov Frantsııanyń Qazaqstandaǵy Elshisi Sılvan Gıogemen kezdesti. Bul týraly vedomstvonyń baspasóz qyzmeti málim etti. 

Kezdesý barysynda taraptar elder arasyndaǵy AÓK salasyndaǵy ekijaqty yntymaqtastyqty nyǵaıtý máselelerin talqylady.

Mınıstr birinshi kezektegi baǵyttardyń biri — ózara saýda kólemin ulǵaıtý ekenin atap ótti.

«2024 jyldyń 8 aıynda elder arasyndaǵy AÓK óniminiń taýar aınalymy 67 mln. dollardy qurady, onyń ishinde QR-dan Frantsııaǵa raps tuqymdarynyń eksportyn ulǵaıtý esebinen 6 esege jýyq ósti», - delingen habarlamada.

Kezdesý barysynda usaq mal eksportyna qoıylatyn veterınarııalyq talaptarǵa ózgerister engizý máseleleri talqylandy, iri qara maldyń qoldan uryqtandyrý jáne frantsýz tuqymynyń kómegimen qazaq tuqymdaryn jaqsartý jónindegi birlesken joba qaraldy.

Eýropalyq naryqqa jylqy etin eksporttaý máselesi de mańyzdy taqyryptardyń birine aınaldy.

Esterińizge sala keteıik, qazan aıynyń basynda Frantsııada ótken Mal sharýashylyǵy sammıti aıasynda qazaqstandyq kompanııalar arasynda jylqy etin jetkizýdi uıymdastyrý boıynsha yntymaqtastyq týraly kelisimge qol qoıyldy. Búgingi tańda sharýa jáne fermerlik qojalyqtar Frantsııaǵa jylqy etin eksporttaýǵa qyzyǵýshylyq tanytyp otyr. 

Kezdesý sońynda Aıdarbek Saparov aıtylǵan máseleler elder arasyndaǵy aýyl sharýashylyǵy salasyndaǵy yntymaqtastyqty odan ári damytýǵa yqpal etetinine senim bildirdi.

Eske sala keteıik, buǵan deıin otandyq jylqy ósirýshiler tyǵyryqqa tirelip otyrǵany jóninde jazǵan bolatynbyz.