Frantsýz úkimeti Maıottany eki jyl ishinde qalpyna keltirýdi kózdep otyr

ASTANA. KAZINFORM — «Shıdo» daýylynan zardap shekken Frantsııanyń sheteldegi Maıotta departamenti eki jyl ishinde qalpyna keltiriledi dep josparlanyp otyr.

Bul týraly respýblıkanyń premer-mınıstri Fransýa Baırý arhıpelagqa jasaǵan jumys sapary barysynda málimdedi, dep habarlaıdy TASS aqparat agenttigi. 

Onyń úndeýin BFMTV telearnasy kórsetti. 

— Bul — bizdiń aldymyzǵa qoıǵan maqsat, — dep jaýap berdi mınıstrler kabınetiniń basshysy qalpyna keltirý jumystaryn eki jylda aıaqtaý múmkin be degen suraqqa.

Baırý sonymen qatar «Shıdo» daýyly saldarynan departamentte birneshe júzdegen adamnyń qaza bolýy múmkin ekenin atap ótti.

— Myńdaǵan adam ólimi týraly qaýeset negizsiz. Biz birneshe ondaǵan nemese júzdegen adamdar týraly aıtyp otyrmyz, — dedi ol.

Buǵan deıin premer-mınıstr úkimet Maıottany qalpyna keltirýdiń uzaq merzimdi josparyn ázirlegeni týraly habarlaǵan bolatyn.

Baırý Mamýdzýǵa (departamenttiń ákimshilik ortalyǵy) dúısenbi kúni keldi. Onymen birge bilim mınıstri Elızabet Born men shetel isteri mınıstri Manıýel Vals bar.

Daýyl Maıottada 14 jeltoqsanda soǵyp, jeldiń ekpini 55 m/s-tan asty. Jergilikti bıliktiń málimetinshe, tabıǵı apat saldarynan 39-dan astam adam qaza taýyp, 5,6 myńnan astam adam jaraqat alǵan.

Eske sala ketsek, buǵan deıin Úndi muhıtyndaǵy Frantsııaǵa tıesili Maıotta arhıpelagynda «Shıdo» atty joıqyn tsılonnan soń qutqarý jumystary júrip jatqanyn jazǵan edik.

Keıinnen Frantsııa prezıdenti Emmanıýel Makron Maıottaǵa ushyp, ulttyq aza tutý jarııalaıtyny belgili boldy.