Frantsýz tarıhshysy: Eýropadaǵy Altyn Orda týraly teris túsinikti ózgertkim keldi
ASTANA. KAZINFORM — Frantsýz tarıhshysy Marı Favero Eýropada Altyn Orda men kóshpeli halyqtar týraly qalyptasqan teris kózqarasty ózgertkisi kelgenin aıtty. Bul týraly ol Jibek Joly telearnasynyń «BúginLIVE» baǵdarlamasynda baıandady.
Marı Faveronyń aıtýynsha, Eýropanyń ǵylymı ortasynda uzaq ýaqyt boıy «Orda» uǵymyna teris mán berilip, kóshpeli halyqtardy júıesiz, saýatsyz dep qabyldaǵan. Olardyń órkenıetine tómen qaraǵandar da bolǵan.
— Árıne, «Orda» ataýyna da teris kózqaras boldy. Eýropanyń ǵylymı ortasynda kóshpeli halyqtardy júıesiz, saýatsyz dep qabyldap, olarǵa tómen qaraǵandar boldy. Men osy túsinikti ózgertkim keldi. Kitabymda «Orda», «Altyn Orda» uǵymdaryna múlde basqa qyrynan qaraýǵa bolatynyn kórsetýge tyrystym, — dedi Marı Favero.
Tarıhshynyń sózinshe, Altyn Orda óz dáýirindegi qýatty ári júıeli memleket bolǵan. Ol kóshpeli halyqtardy tek jaýynger jurt retinde qabyldaýdyń da jańsaq ekenin atap ótti.
— Altyn Orda óte kúshti ári qýatty memleket boldy. Onyń ózine tán júıesi boldy. Kóshpeli halyqtar da buryn oılaǵandaı álsiz nemese tek jaýynger jurt bolǵan joq. Osyny kitabymda jan-jaqty túsindirýge tyrystym, — dedi ǵalym.
Marı Faveronyń «Altyn Orda. Dala ımperııasy álemdi qalaı ózgertti» atty eńbegi qazaq tilinde jaryq kórdi. Kitapta Altyn Ordanyń qalyptasýy men damýy, Eýropa jáne Azııa elderimen baılanysy jan-jaqty qarastyrylady.
Eńbekti Steppe & World Publishing baspa úıi qazaq tiline aýdaryp, jaryqqa shyǵardy. Baspanyń negizin qalaýshy ári dırektory Raısa Qadyrdyń aıtýynsha, bul eńbek qazaq oqyrmanyna Altyn Orda tarıhyn sheteldik zertteýshiniń paıymymen ana tilinde oqýǵa múmkindik beredi.
Aıta keteıik, buǵan deıin Memlekettik keńesshi Erlan Qarın Marı Faveromen kezdesip, ǵalymnyń Altyn Orda tarıhyna arnalǵan eńbeginiń qazaq tilinde jaryq kórýin otandyq oqyrman úshin mańyzdy oqıǵa dep baǵalaǵan edi.
