Frantsýz oqýshylarynyń narazylyǵy Belgııaǵa jetti
ASTANA. KAZINFORM – Frantsııada bir aptadan beri ótip jatqan joǵary synyp oqýshylarynyń narazylyǵy 1 qazanda kórshi Belgııaǵa da jetti. Bul týraly Kazinform agenttiginiń tilshisi habarlady.
Beısenbi kúni Belgııanyń shyǵysyndaǵy frantsýz tildi Lej qalasy men oǵan irgeles aýmaqta júzdegen oqýshy mektepterdiń kireberisin jaýyp, oqý oryndarynyń jumysyna kedergi keltirgen. Keıbir jerlerde narazylyq sońy órtke ulasyp, mektep ǵımarattary búlindi.
Narazylyq Lejdegi Athénée de Fragnée, Saint-Laurent, Saint-Sépulcre mektepteri men Hors-Château aýdanyndaǵy Institut Marie-Thérèse oqý ornynda, sondaı-aq Visé, Seraing jáne Esneux qalalaryndaǵy birqatar bilim berý mekemesinde boldy.
CGSP Enseignement kásipodaǵynyń aımaqtyq hatshysy Jorra Devıttiń aıtýynsha, qozǵalysqa shamamen on oqý orny qatysty. Oqýshylar synyptardaǵy oqýshy sanyn azaıtýdy, muǵalim tapshylyǵyn joıýdy, oqýshylar men ata-analardyń pikirin eskeretin «shynaıy dıalogty» qalyptastyrýdy jáne barshaǵa qoljetimdi bilim berý júıesin talap etti.
Lej polıtsııasynyń málimetinshe, jınalǵandar kóp uzamaı tártip buza bastaǵan. Narazylyq kezinde qoqys jáshikteri órtengen, tártip saqshylaryna túrli zattar men jarylǵysh oıynshyqtar laqtyrylǵan. Terezeler synyp, ǵımarattardyń qasbetteri zaqymdanǵan.
Oqıǵaǵa baılanysty polıtsııa alty adamdy ustady. Saǵat 13:00-den keıin tártip buzý faktileri tirkelmegen. Kommýnaldyq qyzmetter kósheni tazalap bolǵan soń, Hors-Château kóshesi qaıta ashyldy.
Osy ýaqytta Lej ben Namıýr qalalarynda beıbit sherý ótip, olarǵa keı jerlerde muǵalimder de qatysty.
Belgııalyq BAQ bul qozǵalystyń Frantsııadaǵy narazylyqqa baılanysty órshigenin jazdy. Aktsııa kezinde túsirilgen beınejazbalarda frantsýz tildi qaýymdastyqtyń bilim mınıstri, «Reformatorlyq qozǵalys» partııasynyń ókili Valerı Glatınıge qarata «Glatını, ket!» degen uran aıtylǵan. Oǵan mınıstr usynǵan bilim reformasy sebep boldy. Synshylar bul ózgeris muǵalimderdiń júktemesin arttyryp, bilimniń qoljetimdiligine keri áser etedi dep esepteıdi.
Frantsııada 1 qazanǵa qaraı narazylyq lıtseılerden bólek, ózge oqý oryndaryna da tarady. Іshki ister mınıstrliginiń málimetinshe, bir kún buryn 356 oqý orny narazylyqqa qatysyp, 625 adam ustalǵan. Qaýipsizdik kúshteriniń 83 qyzmetkeri jaraqat alǵan.
Beısenbide stýdentter de narazylyqqa qosyldy. Union étudiante málimetinshe, shamamen 30 kampýs jabyldy. Nant pen Rýan qalalarynda mektepterdiń kireberisinde órt shyqqany habarlandy.
Premer-mınıstr Sebasten Lekornıý vedomstvoaralyq daǵdarys shtabyn jınap, narazylyqtyń órshýin «jaýapsyzdyq» dep atady.
Qozǵalys 17-21 qyrkúıek aralyǵynda Il-de-Frans óńirindegi Kreteı akademııasynda bastaldy. 15-18 jastaǵy lıtseı oqýshylary muǵalim tapshylyǵyn joıýdy, synyptaǵy oqýshy sanyn azaıtýdy, mektep ǵımarattaryn jóndeýdi jáne Parcoursup júıesine baılanysty oqý kestesin jeńildetýdi talap etti. Lıtseı oqýshylarynyń USL uıymy men Union étudiante 1 qazandy narazylyqtyń «ekinshi kezeńi» dep jarııalap, aktsııalardy 6 qazanda jalǵastyrýǵa shaqyrdy.
Buǵan deıin Frantsııada jappaı narazylyqqa baılanysty 400-den astam lıtseıde sabaq onlaın formatqa kóshkenin habarlaǵan bolatynbyz.
