Frantsýz kompanııasy eldiń ońtústiginde alyp jel elektr stantsııasyn salýdy bastady
ASTANA. KAZINFORM - Jambyl oblysynyń Moıynqum aýdanynda aýqymdy joba – qýaty 1 GVt bolatyn jáne energııany jınaqtaý júıesimen biriktirilgen «Mırnyı» jel elektr stantsııasynyń qurylysy bastaldy.
QR Energetıka mınıstrligi baspasóz qyzmetiniń habarlaýynsha, jobany frantsýzdyń «Total Energies» kompanııasy júzege asyryp jatyr. Jobanyń jalpy ınvestıtsııa kólemi 1,1 mlrd dollardy quraıdy. Jel elektr stantsııasyn iske qosý 2028 jyldyń IV toqsanyna josparlanǵan.
Nysannyń ornatylǵan qýaty 1 GVt bolady, bul ony Qazaqstandaǵy jańartylatyn energetıka salasyndaǵy eń iri jobalardyń birine aınaldyrady. Joba aıasynda Envision jáne SANY kompanııalarynyń 150 zamanaýı jel týrbınasyn ornatý kózdelgen. Sonymen qatar frantsýzdyń Saft kompanııasynan qýaty 600 MVt·saǵ bolatyn energııa jınaqtaý júıesi engiziledi.
Jyl saıynǵy elektr energııasyn óndirý kólemi 4 mlrd kVt·saǵ-qa deıin jetedi dep kútilýde, bul kómirqyshqyl gazy shyǵaryndylaryn keminde jylyna 3,2 mln tonnaǵa qysqartýǵa múmkindik beredi.
Jobany iske asyrý Qazaqstanda «jasyl» energetıkany damytýǵa, energetıkalyq qaýipsizdikti arttyrýǵa jáne ekonomıkany dekarbonızatsııalaý maqsattaryna qol jetkizýge eleýli úles qosady.
-Jalpy, Energetıka mınıstrligi jańartylatyn energııa kózderin damytý boıynsha júıeli jumys júrgizip keledi. Bıyl jalpy qýaty 245 MVt bolatyn 10 JEK jobasyn iske qosý josparlanyp otyr, onyń ishinde 4 JES, 5 KES jáne 1 SES bar. Osy jyly 8,8 mlrd kVt·saǵ «jasyl» energııa óndirý josparlanyp otyr,-delingen habarlamada.
Sondaı-aq onda naryqty damytýdyń mańyzdy quraly retinde 2024–2027 jyldary 6,7 GVt kóleminde aýktsıondyq saýda-sattyq ótkizý jalǵasatyny aıtylǵan.
Masdar, China Power jáne China Energy sekildi álemdik kóshbasshylardyń jobalaryn iske asyrý bastalady.
Uzaq merzimdi perspektıvada 2035 jylǵa deıin elde 8 GVt-tan astam JEK qýatyn engizý josparlanyp otyr. Bul ulttyq energııa júıesiniń turaqtylyǵyn qamtamasyz etip, energııa teńgerimin ártaraptandyrýǵa múmkindik beredi.
Osyǵan deıin Qazaqstan men AQSh energetıka salasyndaǵy yntymaqtastyqty kúsheıtetini týraly jazdyq.
