Frantsýz fılmderi alǵash ret qazaq tilinde kórsetiledi

ASTANA. KAZINFORM – Qazaqstanda frantsýz premeralarynyń aptalyǵy uıymdastyrylyp, odan keıin qazaq tilindegi frantsýz fılmderi usynylady. Frantsııanyń Qazaqstandaǵy elshiliginde Qazaqstan men Frantsııanyń kınoóndiris salasyndaǵy yntymaqtastyǵy týraly tolyǵyraq aıtyldy.

– Biz qazan aıynda frantsýz fılmderi premeralarynyń aptalyǵyn ótkizýdi josparlap otyrmyz. Onda eń tanymal frantsýz fılmderi qazaqstandyq kórermen nazaryna usynylady. Premera aptasynan keıin biz alǵash ret qazaq tiline dýblıajdalǵan frantsýz fılmderiniń kórsetilimin uıymdastyrýdy kózdep otyrmyz. Biz Frantsııadaǵy qazaq fılmderin qoldaýǵa daıynbyz. Sondaı-aq Frantsııanyń ulttyq kınematografııa jáne anımatsııa ortalyǵy (CNC) sarapshylarynyń Qazaqstanǵa jumys sapary uıymdastyrylady, - dep habarlady Frantsııanyń Qazaqstandaǵy elshiligi.

Sondaı-aq eki baǵyt boıynsha turaqty kezdesýler ótkizý josparlanyp otyr: birlesken kıno óndirisi jáne eki jaqty kınoprokat.

– Bilim berý semınarlary men qazaqstandyq mamandardy Frantsııada oqytý múmkindikteri qarastyrylyp jatyr. Memlekettik kınony qoldaý ortalyǵymen jáne sala mamandarymen birlese otyryp, eń paıdaly baǵyttardy anyqtaýǵa kúsh salamyz», - dep naqtylady Frantsııanyń Qazaqstandaǵy elshiligi.

Esterińizge sala keteıik, Qazaqstannyń Ulttyq kınematografııasyn qoldaý ortalyǵy men Frantsııanyń Ulttyq kınematografııa jáne anımatsııa ortalyǵy Kanndaǵy halyqaralyq kınofestıval aıasynda yntymaqtastyq týraly qosymsha kelisimge qol qoıdy. Taraptar kınoónimderin taratý máseleleri boıynsha yntymaqtasýǵa kelisti.