Frantsýz depýtattary premer-mınıstr Baırýǵa senimsizdik bildirdi

ASTANA. KAZINFORM — Qatań ekonomıkalyq únemdeý josparyna baılanysty týyndaǵan daýly jaǵdaı saldarynan 8 qyrkúıekte Frantsııa parlamentiniń tómengi palatasy premer-mınıstr Fransýa Baırýdy qyzmetinen bosatty, dep jazady DW.

Depýtattar 74 jastaǵy úkimet basshysyna toǵyz aı jumys istegennen keıin senimsizdik tanytty.

Senim máselesi boıynsha daýys berýden buryn Baırý Ulttyq jınalystyń jedel otyrysynda 2026 jylǵa arnalǵan qatań únemdeýdi qamtıtyn bıýdjetti bekitý úshin taǵy da qoldaý izdedi. Bul bıýdjet shyǵystardy shamamen 44 mıllıard eýroǵa qysqartýdy kózdeıdi. Oppozıtsııa otyrystan buryn-aq Baırýǵa senim bildirýge qarsy daýys beretinin málimdegen.

Saıası daǵdarys jaǵdaıynda úkimetke qarsy narazylyqtar men ereýilderge shaqyrýlar jıilep jatyr. Keıbir kásipodaqtar 10 qyrkúıekte ereýil bastaýǵa úndeý jasasa, kópshilik uıymdar ony 18 qyrkúıekke josparlap otyr.

Aıta keteıik, Fransýa Baırý 2024 jylǵy jeltoqsanda premer-mınıstr bolyp taǵaıyndalyp, úsh aıdan keıin senimsizdikke ushyraǵan Mıshel Barne ornyna keldi.