Frantsııanyń jańa premer-mınıstri úkimet múshelerine beriletin «ómir boıǵy» jeńildikterdi alyp tastamaq

ASTANA. KAZINFORM — Jýyrda taǵaıyndalǵan Frantsııa Úkimetiniń basshysy Sebastıan Lekornıý burynǵy úkimet múshelerine beriletin ómir boıǵy jeńildikterdiń kúshin joıatyndyǵyn málimdedi, dep habarlaıdy Kazinform agenttiginiń menshikti tilshisi.

Frantsýz úkimetiniń burynǵy múshelerine arnalǵan artyqshylyqtar 2026 jyldyń 1 qańtarynan bastap joıylady.

Bul týraly Sebastıan Lekornıý óziniń X (burynǵy Twitter) áleýmettik jelisindegi paraqshasynda rastady:

– Memleket sheneýnikterge qaýip tóngen jaǵdaıda qorǵaýy tıis bolǵanymen, ýaqytsha laýazym ıeleriniń ómir boıy jeńildikterdi paıdalanýy – aqylǵa syıymsyz, – dep jazdy ol.

Premer-mınıstr atap ótkendeı, mundaı jeńildikterdiń biri – polıtsııalyq qorǵaý, aldaǵy ýaqytta ol tek burynǵy premer-mınıstrler men ishki ister mınıstrlerine ǵana shekteýli merzimge beriledi jáne naqty qaýip-qaterdiń deńgeıine qaraı ǵana uzartylatyn bolady.

Qazirgi ýaqytta Frantsııada úkimettiń burynǵy músheleri qyzmettik kólik pen júrgizýshini, sondaı-aq jeke hatshyny 10 jylǵa deıin, biraq 67 jasqa tolǵanǵa deıin paıdalana alady.

2019 jyly frantsýz úkimeti burynǵy sheneýnikterdiń qyzmettik kóligi men kómekshileri úshin shamamen 1,6 mln eýro, al olardyń polıtsııa qorǵaýy úshin taǵy 2,8 mln eýro jumsaǵan.

Alaıda, jańa premer-mınıstr Sebastıan Lekornıý bıýdjet tapshylyǵyn azaıtý úshin memlekettik eki merekeni alyp tastaý týraly burynǵy úkimet basshysy Fransýa Baırý usynǵan ıdeıadan bas tartty.

Eske sala keteıik, buǵan deıin Frantsııa BUU-nyń «eki memleket» deklaratsııasyna biraýyzdan qoldaý bildirgenin jazǵan edik.