Frantsııa Іshki ister mınıstri JOO-larda hıdjab kııýge tyıym salýdy qoldady

ASTANA. KAZINFORM — Frantsııanyń Іshki ister mınıstri Brýno Retaıo ýnıversıtetterde hıdjab kııýge tyıym salý ıdeıasyn qoldady, dep habarlaıdy Anadoly.

RMC telearnasynyń efırinde sóılegen mınıstr joǵary oqý oryndarynda hıdjabqa tyıym salý máselesine qatysty túsinikteme berdi.

Júrgizýshiniń «Ýnıversıtetterde hıdjabqa tyıym salý kerek pe?» degen suraǵyna Retaıo oń jaýap berdi.

— Iá, men muny qalaımyn, óıtkeni men dástúrli musylman dinine esh qatysy joq ıslamızmniń qalaı damyp jatqanyn kórip otyrmyn, — dedi ol.

Mınıstrdiń aıtýynsha, másele «óz qundylyqtaryn, sonyń ishinde áıeldiń er adamǵa baǵynyshty bolýy kerek degen ıdeıalardy tańatyn ıslamızm» tóńireginde bolyp otyr.

Ol mundaı qubylystar erekshe saqtyqty talap etetinin atap ótti.

Sonymen qatar Retaıo onyń ustanymyn musylmandarǵa qarsy dushpandyq retinde qabyldaýǵa bolmaıtynyn málimdedi.

— Saıası ıslam musylmandardyń senimin burmalaıdy, — dedi ol.

Mınıstr óziniń qoǵamda úlken rezonans týdyrǵan «Hıdjabqa ólim» degen sózderin túsindire otyryp, aıtqan sóziniń túpkilikti máninen bas tartpaıtynyn jetkizdi.

Eske salsaq, 26 naýryzda Parıjde mınıstr sahnada turyp: «Sport jasasyn, hıdjab joıylsyn!» dep urandatqan bolatyn.

Frantsııada 2004 jyldyń naýryz aıynan bastap bastaýysh jáne orta mektepterde hıdjab kııýge tyıym salatyn zań kúshine endi. Alaıda qazirgi ýaqytta ýnıversıtetter bul zańnyń qoldanysynan tys qalyp otyr.