Frantsııanyń iri kompanııalarynyń biri Qazaqstanǵa birlesken kásiporyn ashýdy usyndy

ASTANA. KAZINFORM - Frantsııaǵa resmı sapary barysynda Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev iri frantsýz kompanııalary men memlekettik qurylymdardyń ókilderimen kezdesti.

Mınıstrliktiń baspasóz qyzmetiniń habarlaýynsha, kezdesý barysynda seriktestikti damytý máseleleri qarastyryldy.

Talqylaýlardyń negizgi baǵyttary: bultty tehnologııalar, jasandy ıntellekt (JI), kıberqaýipsizdik, ǵaryshty zertteý jáne joǵary jyldamdyqty ınternetke qoljetimdilikti qamtamasyz etý. Frantsýz tarapy Qazaqstannyń tsıfrlyq transformatsııa salasyndaǵy jetistikterine joǵary baǵa berip, tájirıbe almasý jáne yntymaqtastyq ornatýǵa daıyn ekendikterin bildirdi.

Tsıfrlyq platformalardy avtomattandyrý, masshtabtaý jáne qaýipsizdikke arnalǵan bultty sheshimder salasyndaǵy Frantsııanyń iri kompanııalarynyń biri Clever Cloud qazaqstandyq naryqqa keńeıýge qyzyǵýshylyq tanytyp, birlesken kásiporyn ashýdy usyndy. Clever Cloud Qazaqstandy óz qyzmetterin keńeıtý úshin áleýetti seriktes retinde kórip, bul qadam eldiń tehnologııalyq ınfraqurylymyn kúsheıtýge múmkindik beredi.

Airbus kompanııasymen ótken kezdesýde ǵarysh jáne avıatsııa tehnologııalaryn damytýǵa basymdyq berildi. Qazaqstan Airbus sheshimderin tabıǵı resýrstardy monıtorıngileý, ekologııany basqarý jáne avıatsııa sektoryn tsıfrlandyrý maqsatynda paıdalanýǵa qyzyǵýshylyq tanytty. Sonymen qatar, Airbus kompanııasy ózderiniń uzaq qashyqtyqqa ushatyn Zefir ushqyshsyz ushý apparatyn tanystyryp, bul apparattyń synaqtaryn Qazaqstanda júrgizýdi usyndy.

Synchrotron Soleil kompanııasymen júrgizilgen kelissózder jasandy ıntellekt jáne úlken derekter salasynda ǵylymı yntymaqtastyq múmkindikterin ashty. Birlesken zertteý jobalary jasandy ıntellekt qoldaný arqyly úlken derekterdi taldaýǵa baǵyttalatyn bolady.

Thales kompanııasymen ótken kezdesýde kıberqaýipsizdik pen tehnologııalyq zertteýler máseleleri talqylandy. Mınıstr Thales kompanııasynyń zertteý ınstıtýtyna ekskýrsııa jasap, onda jasandy ıntellekt, kvanttyq esepteýler jáne chıpterdi ázirleýge erekshe nazar aýdardy. Qazaqstan Thales sheshimderin mańyzdy ınfraqurylymdardy qorǵaý jáne kıberqaýipsizdik salasyndaǵy tájirıbe almasý arqyly qaýipsizdikti arttyrýǵa qyzyǵýshylyq bildirdi.

Frantsııanyń jasandy ıntellekt jáne tsıfrlyq transformatsııa máseleleri jónindegi Memlekettik hatshylyǵymen bolǵan kezdesýde eki eldiń tsıfrlyq transformatsııasy boıynsha tájirıbe almasý máseleleri, onyń ishinde GovTech salasyndaǵy jetistikter talqylandy, bul salada Qazaqstan edáýir tabystarǵa jetken. Taraptar úzdik tájirıbelermen almasý úshin onlaın-kezdesý ótkizýdi, sondaı-aq kelesi jyldyń aqpan aıynda ótetin AI Summit is-sharasyna qatysý josparlaryn talqylady. Qazaqstan kelesi AI Summit is-sharasyn Astanada ótkizýdi usyndy, sondaı-aq frantsýz tarapyn jyl saıynǵy Digital Almaty forýmyna qatysýǵa shaqyrdy.

OneWeb kompanııasymen bolǵan kezdesýde kompanııanyń spýtnıktik sheshimderin Qazaqstanda tıimdi sharttarda paıdalaný múmkindigi qarastyryldy. OneWeb tehnologııalaryn qashyqtaǵy óńirlerde tsıfrlyq teńsizdikti joıý jáne tsıfrlyq qyzmetterge qoljetimdilikti qamtamasyz etý úshin joǵary jyldamdyqty ınternetti taratýda paıdalaný ózekti bolyp tabylady.

Mınıstr bul kezdesýler frantsýz kompanııalary jáne memlekettik qurylymdarmen ózara tıimdi yntymaqtastyqqa berik negiz qalaıdy dep senim bildirdi. Strategııalyq baǵyttar boıynsha birlesken kúsh-jiger — tsıfrlandyrý, jasandy ıntellekt jáne kıberqaýipsizdik salalary — Qazaqstanǵa tsıfrlyq transformatsııany jedeldetýge, ınnovatsııalyq ekojúıeni damytýǵa jáne azamattardyń ómir súrý sapasyn arttyrýǵa múmkindik beredi.

Aıta keteıik, Qazaqstan Prezıdenti Qasym-Jomart Toqaev Frantsııa Respýblıkasynda memlekettik saparmen júr. Búgin Elıseı saraıynda Qasym-Jomart Toqaev pen Frantsııa Prezıdenti Emmanıýel Makron kelissóz júrgizedi.

Osy rette búgin Frantsııanyń áıgili Gıme mýzeıinde «Qazaqstan: Uly Dala jaýharlary» kórmesi ashyldy.